Алфа и омега на модната Библија, односно на магазинот „Вог“, која со децении ја носи истата боб фризура, а темните очила за сонце не ги вади од лицето, вчера направи мал преседан. Ана Винтур накратко заборави на својот заштитен знак и ги покажа очите, а за сè е „виновен“ кралот Чарлс, кој вчера во Бакингемската палата ја одликуваше со орден.

Ледената кралица на модната индустрија, успеа да направи бренд од своето име, а приказната започна во втората половина на осумдесетите, кога го презеде американскиот „Вог“ и го издигна на незамисливи височини. Ана Винтур, една од најмоќните жени на денешницата, еднаш ја доби титулата Дама од кралицата Елизабета Втора, а вчера кралот Чарлс ѝ ја додели титулата „Придружник на честа“ (Companion of Honour).

 

View this post on Instagram

 

A post shared by The Royal Family (@theroyalfamily)

Харизматичната Англичанка е и голем филантроп. Благодарение на Мет Гала, гламурозниот настан на кој е креативен директор од 1995 година, Ана Винтур собра неколку стотици милиони долари за Метрополитен музејот на уметност во Њујорк. Зад неа има уште многу добри дела. Нејзиниот придонес во модната индустрија е несомнен.

За дочекот во Бакингемската палата таа избрала креација на британската модна куќа Александар Меквин. Деловно елегантна верзија, во нејзин стил. Како што рекла, била изненадена што добила уште една висока кралска награда.

– Последен пат кога бев на ова место, кралицата Елизабета ме прогласи за дама. Тогаш се согласивме дека и двете многу долго време си  ја работиме нашата работа – се пошегувала Ана Винтур, евоцирајќи ги спомените од средбата во 2017 година.

Иако во ноември го прослави 75-тиот роденден, уредничката на „Вог“, која сега е и претседател на издавачката куќа „Конде Наст“, ​​му рекла на кралот Чарлс дека нема намера да се пензионира.

– Ме праша дали планирам наскоро да престанам да работам. Мојот одговор беше краток и дециден – не.

Овде мора да забележиме дека малкумина се осмелуваат да ѝ кажат „не“.

А додека кралот ѝ го закачувал орденот на нејзиниот ревер, дамата Винтур од почит ги извадила своите очила за сонце. А потоа следувал уште поголем шок – широка насмевка.

Модната икона ретко се појавува во јавност без својот омилен реквизит, но има добра причина за тоа:

– Темните очила ми помагаат да гледам, но и да не ме гледаат.