Без разлика дали ќе го посетите напролет и во лето, кога е преполн со туристи кои го истражуваат градот на две тркала, или за време на есенските и зимските месеци, кога изобилува со интересни настани и манифестации, патувањето во Амстердам секогаш е добра идеја!

Ова е град кој ги маѓепсува сите што го посетуваат, има повеќе велосипеди отколку жители, повеќе од 1.200 шармантни канали, познат е по својата отвореност и толеранција, како и по музеите од светска класа кои денес се меѓу најпосетуваните атракции во светот, пишува „Путни кофер“.

Овие импресивни музеи во Амстердам чуваат исклучителни уметнички и историски богатства и секој треба да ги посети барем еднаш во животот!

Музејот на Ван Гог ја има најголемата збирка слики на славниот уметник

Музејот на Ван Гог во Амстердам е еден од најпопуларните музеи во светот, кој привлекува посетители од сите краишта на планетата. Се разбира, тоа е главно затоа што во него се наоѓа најголемата колекција на дела од славниот уметник – повеќе од 200 слики, 500 цртежи и 700 негови писма. Од неговото првично отворање на плоштадот со музеи во 1973 година, музејот постојано се проширува и модернизира за да обезбеди врвен изложбен простор за посетителите.

Посетата на музејот на Ван Гог претставува навистина уникатно и инспиративно искуство како за локалните жители, така и за туристите. Освен препознатливите постимпресионистички дела на Ван Гог, како што се неговите импресивни пејзажи, автопортрети и слики на мртва природа, со посебен акцент на познатите „Сончогледи“, музејот нуди и извонредна можност за истражување на уметниковиот развој и споредба на неговите слики со други уметнички дела од 19 век.

Куќата на Ана Франк – биографски музеј посветен на нејзиниот живот

Подгответе се за длабоко емотивно искуство кога ќе зачекорите во импресивната зграда која се наоѓа на каналот Принсенграхт, во близина на Вестеркерк. Тука Ана Франк и нејзиното семејство живееле во тајност две тешки години, од 1942 до 1944 година, за да избегнат депортација. Денес, куќата на Ана Франк нуди длабока рефлексија додека ги истражувате нејзините простории низ призмата на историјата и контекстот на 40-тите години од минатиот век. Овој фасцинантен музеј нуди мултимедијално искуство, вклучувајќи изложби, филмови и аудиоводичи, за подобро разбирање на приказната на ова еврејско семејство и нивното страдање за време на Втората светска војна.

Амстердамскиот музеј, посветен на минатото и сегашноста на градот

Амстердамскиот музеј раскажува фасцинантна приказна за градот со 1.250 канали и ја следи богатата историја на холандската престолнина, од средниот век до современото време, користејќи динамични и интерактивни аудиовизуелни презентации. Особено импресивна е проекцијата која нуди брз преглед на градот од птичја перспектива, почнувајќи од првите насипи од 12 век. Исто така, се издвојува делот посветен на 19 век, периодот на огромни урбани промени кои го обликувале Амстердам каков што го познаваме денес.

Државниот музеј, посветен на уметноста и историјата на Амстердам

Сместен во величествена неоренесансна зграда со кули кои потсетуваат на катедрали, најголемиот музеј во Амстердам чува неверојатна колекција со околу 30.000 уметнички дела и 5.000 слики, меѓу кои има 400 ремек-дела од Златното доба на холандската уметност. Rijksmuseum се гордее и со најголемата колекција слики на холандскиот мајстор Рембрант, вклучувајќи го неговото славно дело „Ноќната стража“. Овој музеј дефинитивно вреди да се посети, бидејќи нуди длабок увид во богатата уметнничка и културна сцена на оваа прекрасна земја.