Возачот на „Ред Бул“, Макс Ферстапен е победник на трката за Големата награда на Мајами (САД), која се возеше како дел од шампионатот во Формула 1. Двократниот последователен светски шампион ја забележа 38 победа во кариерата и трета сезонава, додека неговиот тимски колега Серхио Перес заврши на второто место.

Третата позиција му припадна на возачот на „Астон Мартин“ Фернандо Алонсо, возачот на „Мерцедес“ Џорџ Расел заврши четврти, а Карлос Саинц од „Ферари“ ја освои петтата позиција.

На шестото место заврши возачот на „Мерцедес“, Луис Хамилтон, седми е Шарл Леклер од „Ферари“, а бодови освоија и Пјер Гасли и Естебан Окон од „Алпин“, како и Кевин Магнусен од „Хаас“.

Дополнителен бод за најбрзи круг му припадна на победникот на трката. Трката во Мајами се одржа по вторпат, а во текот на целиот викенд патеката ја посетија вкупно 270.000 луѓе, 30.000 повеќе од минатата година.

Во генералниот пласман по пет трки води Ферстапен со 119 бодови, втор е Перес со 105, додека трет е Алонсо со 75 бодови. Следната трка ќе се вози за Големата награда на Емилија Ромања во Италија на 21 мај.