Од филмската програма во Кинотеката што се прикажува во овој период издвојуваме два наслова кои можат да го предизвикаат вниманието на публиката со своите луцидни идеи и моменти на контроверзност.

Хрватскиот игран филм „И свињите одат во рајот“ во режија на Горан Дукиќ на програмата во Кинотеката е на 12 и 13 мај, со проекции во 18 часот. Станува збор за хрватско-македонска копродукција, а македонски малцински копродуцент е „Вертиго вижуал“.

Сценариото е на Сандра Антолиќ, а во филмот играат Наташа Дорчиќ, Теса Литван, прасицата Беба, Пјер Меничанин, Љубо Зечевиќ. Со епизодни улоги во филмот се појавуваат и македонските актери Атанас Атанасовски од Театар Комедија и Љупчо Тодоровски-Упа (1956-2021), за кого тоа е последната улога во филм.

Приказната во филмот ја раскажува семоќниот и сезнаен наратор Исус Христос (33 години), заедно со подеднакво сезнајната тетка Анка (55) и љубопитната прасица Беба (2), кои се главните ликови на оваа рурална комедија со пеење и пукање, сместена во питомото Хрватско Загорје за време на воените 1990-ти. Филмот се фокусира на љубовната драма на Беба и Роки, крмак за расплод од полусрпско потекло, љубовната драма на невестата Анчица и велечесниот отец Вјеран, кој не е младоженец на свадбата, и дефектот на фризерската хауба што ги пореметува подготовките на тетка Анка за „проштењето“, еден вид локален аџилак со цел простување на гревовите. Мајката Божја, како deus ex machina, ја води приказната кон рајски епилог – кочина полна со прасиња и срца полни со проштевање.

Филмот е добитник на наградата на публиката на Пулскиот филмски фестивал, а актерот Љубо Зечевиќ ја освои „Златната арена“ за најдобра споредна машка улога.

Документарниот филм „Ден на ослободувањето“ (Латвија / Норвешка / Словенија, 2016, 100 мин., колор, ДЦП) во режија на Угис Нолте и Мортен Травик ќе биде прикажан на 16 и 19 мај, со проекции во 18 часот.

Норвешкиот режисер Мортен Травик ја смисли досега најчудната севернокорејска приказна: вистинската приказна за тоа како Демократска Народна Република Кореја за првпат покани западна рок-група да свири во земјата. Групата одбрана за оваа чест се словенечките арт-рок ветерани „Лајбах“, формирани во екс-Југославија, познати по тоа што сатирично флертуваат со фашистички метафори.

Идејата на „Лајбах“ е да ги свират своите аранжмани на песни од американскиот мјузикл „Моите песни, моите сништа“, еден од ретките западни филмови дозволени и сакани во земјата. Владата на Северна Кореја прво ги одбила „Лајбах“ поради нивниот дрзок милитаристички шик. Травик прикажува една мачна вечера кога комунистички функционер држи тажен, но прилично искрен говор со кој јасно се става до знаење дека позите на „Лајбах“ се неприфатливи. По тешки преговори со официјалните лица, овој чуден концерт, сепак, се одржа.

Соочувајќи се со строгата идеологија и културолошките разлики, групата се мачи да ги протне своите песни низ иглените уши на цензурата пред да ги претстави пред публиката, која дотогаш не чула алтернативна музика. „Ден на ослободувањето“ е продуциран од Латвија (Литванија) и во 2017 година беше доминантен победник на националниот филмски фестивал во таа земја.

Вечерните термини во Кинотеката од 15 до 21 мај, во 20 часот, се резервирани за современата италијанска кинематографија во рамките на програмата „Недела на италијански филм“.