Петтото издание на филмската манифестација „Златна рамка“ беше можност за публиката бесплатно да ги погледне сите македонски филмски остварувања што биле реализирани во текот на изминатата година, а кои се финансирани и поддржани од Агенцијата за филм.

На програмата на манифестацијата беа прикажани 13 филмски остварувања од минатогодишната продукција, од кои три долгометражни филмови, три документарни и седум краткометражни филмови.

Љубителите на филмот можеа да ги погледнат долгометражните остварувања „Снежана на крајот умира“ во режија на Кристијан Ристески, „Мими“ на Даријан Пејовски и „Најсреќниот човек на светот“ во режија на Теона Стругар Митевска, како и документарните филмови „How do you define arrogance“ режиран од Небојша Илијевски, „Фениксот од Кавадарци – Васил Хаџиманов“ во режија на Мишо Нетков и „Звукот на тишината“ на Анастасија Лазарова.

Во програмата на краткометражни филмови беа прикажани „Тале и Корона“ во режија на Томислав Алексов, „Само ѓаволот се плаши од вода“ на Лидија Мојсовска, „Обичната Ели“ на Лавинија Софрониевска, „Синиот час“ на Ана Јакимска, „Си беше еднаш еден звук“ на Огнен Шапковски, „Бесценета“ на Дејан Јованов и „Соло Мод“ во режија на Тамара Котевска. Проекциите се одржаа во Кино „Фросина“ и во киносалата на Кинотеката.

Манифестацијата има изразена социјална компонента и дел од филмовите беа прикажани во установи каде се сместени граѓани кои не можат да ги гледаат филмовите во кино. Со тематски наслов „Фокус“, во рамките на социјално-инклузивната програма се одржаа проекции во Домот за стари лица „Мајка Тереза“ и во КПД „Шутка“.

На манифестацијата се доделуваат и почесни награди на членови на ДФРМ, а годинава наградите ги добија Камка Тоциновски за филмски актер, Емилија Ивановска-Атанасовска за филмски автор и Драги Јанчев-Црни за филмски работник. Дел од манифестацијата беше и трибината на МЕДИА со наслов „Совети и трикови за кластерот содржина“, која се одржа во МКЦ.

Досегашниот директор, актерот Симеон Мони Дамевски на свечено Собрание на Друштвото на филмски работници (ДФРМ), со кое беше отворена „Златна рамка“, со мнозинство гласови од присутните членови, повторно е избран за директор на Меѓународниот фестивал на филмска камера „Браќа Манаки“. Дамевски ја извршуваше директорската функција од јуни 2021 година, а според статутот на ДФРМ, неговиот нов мандат ќе важи за следните две изданија на фестивалот во Битола.