Министерот за здравство Венко Филипче информира дека компанијата „Фајзер“, која произведува вакцина против ковид 19, одговори на дописот на Министерството за здравство дека може да отпочнат директни преговори за набавка на вакцина. Во гостување во емисијата „Магазин“ на ТВ Сител, Филипче рече дека нашата земја, освен набавка на вакцини преку Ковакс механизмот, стапи и во директна комуникација со компаниите „Фајзер“ и „АстраЗенека“ за набавка на дополнителна доза вакцини за вакцинација и ревакцинација на граѓаните.

– Оваа недела очекуваме одговор и од „АстраЗенека“ што ќе значи дека преку овој механизам со директна комуникација со компаниите производители ќе преговараме за да обезбедиме дополнителни количини на вакцини. Третиот механизам, е преку земјите членки од ЕУ, заради тоа што во нивните договори, освен за нивните граѓани, имаат една количина која е наменета за останатите земји кои не се членки на ЕУ, рече Филипче.

Што се однесува пак до Ковакс системот, тој овозможува еднаков пристап до вакцините на сите земји кои аплицирале, што значи дека во исто врме првите количини на вакцини ќе бидат еднакво дистрибуирани во соодветен процент според населението.

Министерот го објасни и процесот на вакцинација што го нарече комплексен, но затоа се пристапило доста сериозно, анализирани се сите аспекти на вакцинацијата, а веќе течат активности за успешен процес на имунизација. Формирано е специјално координативно тело кое ги анализира сите аспекти на вакцинацијата – прием, чување, дистрибуција и практичната апликација на граѓаните.

Министерот го објасни системот на имунизација во сите сегменти.

– Во делот на чување ќе се користат магацините на економските оператори каде и сега се чуваат вакцините, единствено нешто што ќе биде додаток се фрижидерите на -70 степени за еден тип од вакцините. Фрижидерите ги добиваме како донација од американска фондација со која што имаме долгогодишна соработка и тие фрижидери ќе бидат тука од јануари. Практично ќе бидат поделени кај сите економски оператори. Оттука тргнува процесот на дистрибуција кој е еднаков каков што е и сега за сите други вакцини, до сите ЈЗУ кои имаат пунктови за вакцинација, тоа ќе бидат Здравствените домови, ЦЈЗ и болници. Лекарите здравствениот персонал, медицинските сестри сите вработени кои што треба да се вакцинираат ќе се вакцинираат на местата каде што работат. Вакцинацијата ќе ја спроведат веќе искусни лекари и медицински сестри за кои ќе бидат направени дополнителни обуки, изјави Филипче.