Германскиот ракометен клуб ХСГ Вецлар денеска ја информираше јавноста дека е прекината соработката со македонскиот репрезентативец Филип Кузмановски.

„Зелено-белите“ и Кузмановски предвреме го раскинаа договорот кој беше со важност до крајот на сезоната.

Кузмановски на почетокот на оваа година се пресели од ТСВ Хановер-Бургдорф во Вецлар, а потоа беше надвор од терените неколку недели поради повреда на стапалото што ја заработи со националниот тим.

Вкупно, 27-годишниот играч одигра 27 натпревари за ХСГ Вецлар за време на неговиот престој во тимот постигна 25 гола.

– Договорот беше раскинат спогодбено. Филип дојде кај нас со желба да му биде дозволено да го напушти клубот и ние тоа го испочитувавме, исто така затоа што тој за жал не ги оправда целосно спортските очекувања. Му благодариме на Филип за посветеноста и му посакуваме сè најдобро во иднина – вели генералниот директор на Вецлар, Бјорн Сеип.