ФИФА го казни Фудбалскиот сојуз на Србија пред натпреварот со Албанија, кој ќе се игра на 11 октомври во Лесковац. Според српските медиуми, ФСС доби казна за затворање на 20% од капацитетот на стадионот „Дубочица“, особено на секторите зад головите, како резултат на инцидентите што се случија на мечот со Англија (0:5).

Тоа значи дека на дуелот со Албанија максималниот број гледачи ќе биде ограничен на околу 6.500, од вкупно 8.136 места колку што има стадионот.

Сепак, ФСС може да добие дозвола од ФИФА за делумно зголемување на бројот на присутни, доколку навреме (најдоцна 10 дена пред мечот) поднесе план за распоредување на седиштата. Во тој план треба да бидат вклучени посебни групи со интерес, како семејства, студенти и организации кои се залагаат против дискриминацијата.

Покрај ограничувањето на капацитетот, ФСС ќе мора да плати и парична казна од 80.000 швајцарски франци.

Преземено од: Спорт.ком.мк