Агенцијата за кредитен рејтинг „Фич“ во понеделникот го намали кредитниот рејтинг на Израел од А+ на А, наведувајќи го влошувањето на геополитичките ризици додека војната меѓу Израел и Хамас се одолговлекува. Тој, исто така, задржа негативен изглед за рејтингот, што значи дека е можно дополнително намалување на рејтингот.

„Според нас, конфликтот во Газа би можел да трае до 2025 година и постојат ризици тој да се прошири и на други фронтови“, се вели во соопштението на рејтинг-агенцијата.

Израелскиот министер за финансии, Безалел Смотрич, го омаловажи потегот како „природен“ среде војна и рече дека израелската економија ќе закрепне по одговорните чекори што планира да ги преземе. Стравувањата дека конфликтот во Газа би можел да се претвори во поширока блискоисточна војна ескалираа кон крајот на минатиот месец по убиството на лидерот на Хамас, Исмаил Ханије во Иран и на главниот воен командант на Хезболах, Фуад Шукр во Бејрут. Израелскиот шекел падна за дури 1,7 отсто во однос на доларот во понеделникот, а акциите завршија пониско за над еден отсто во Тел Авив, бидејќи инвеститорите се загрижени за можен напад врз Израел.

Зголемените тензии меѓу Израел и Иран и неговите сојузници може да имплицираат значителни дополнителни воени трошоци, уништување на инфраструктурата и оштетување на економската активност и инвестициите, рече „Фич“. Рејтинг-агенцијата очекува израелската влада трајно да ги зголеми воените трошоци за близу 1,5 отсто од БДП во споредба со нивото од пред војната. Се предвидува дека долгот на земјата ќе остане во нагорен тренд и по 2025 година, доколку продолжат повисоките воени трошоци и економската неизвесност, објави Кликс.ба.