Седумнаесеттото издание на Фестивалот на камерна музика „Златна лира“ ќе се одржи од 16 до 31 октомври во организација на Сојузот на музичките уметници на Македонија – СМУМ. „Златна лира“ е манифестација со богата традиција, посветена на промоција на светското и на домашното исполнителство, но и творештво.

Во рамките на програмата фестивалот во својот традиционален есенски термин ќе понуди девет камерни концерти на кои ќе настапат реномирани домашни уметници кои својот уметнички пат го градат во земјата и надвор од нејзините граници.

Просторот на Музејот на македонската борба во Скопје и овојпат ќе го оплеменат звуците на тенорот Михајло Арсенски во придружба на пијанистот Дино Имери, кои ќе го отворат фестивалот на 16 октомври, пијанистките Хајди Елзесер и Јасмина Трајческа, камерните дуа Љупчо Коскаров (труба) и Дарко Мариновски (пијано), Ристо Ѓоревски (кларинет) и Елена Атанасовска – Ивановска (пијано), Александра Коцевска (мецосопран) во пијано придружба на Глигор Гелебешев, Момчило Куфојанакис (виолина) и Весна Ангеловска Христов (пијано), Даниел Апостолов (фагот) и Дарко Мариновски на пијано.

Во рамките на својата редовна концертна програма, „Златна лира“ традиционално ќе го отстапи својот подиум и на младите уметници со цел нивна промоција и афирмација на почетокот на концертната кариера. Во таа смисла, последниве години СМУМ соработува со меѓународниот натпревар на млади музичари „Охридски бисери“, кој од 2002 година се одржува на годишно ниво во Охрид и опфаќа учесници во повеќе категории и дисциплини од целиот свет.

Плод на таа соработка е наградата за најдобар учесник на натпреварот од Македонија, која ја доделува токму здружението СМУМ, а се состои од организација на концерт во рамките на фестивалот „Златна лира“. На фестивалскиот подиум на ова издание ќе настапат младите уметници Мерт Рустемов (кларинет), Мевљут Асаноски (кларинет), Ѓорѓи Димовски и Арсени Ангелески (пијано).

Свеченото затворање на фестивалот ќе се случи на 31 октомври, а вовед во свеченоста на последната фестивалска вечер ќе биде доделувањето на традиционалната награда „Златна лира“.

Наградата се доделува по предлог и гласање на Управниот одбор на СМУМ, составен од проф. м-р Љубиша Кировски, претседател на СМУМ, проф. д-р Бранко Павловски, проф. м-р Даница Стојанова, проф. м-р Александра Коцевска, проф. д-р Горан Начевски, проф. м-р Страшо Темков и проф. м-р Даниел Апостолов.

Оваа година „Златна лира“ за успешна работа ќе му биде доделена на Триото „Аура“ во состав Ана Гацева – пијано, Страшо Темков – флејта и Марјан Милошевски – фагот, додека наградата за животно дело ќе ѝ биде врачена на пијанистката, професорка по пијано и публицистка Снежана Анастасова Чадиковска.

– Тоа е награда од уметникот за уметникот, затоа сметаме дека е особено значајна за секој уметник кој изминативе години ја добил наградата „Златна лира“ – истакнува проф. м-р Љубиша Кировски, претседател на СМУМ.

Фестивалот „Златна лира“ се реализира во соработка и со поддршка на Министерството за култура, Факултетот за музичка уметност во Скопје, Сојузот на композитори на Македонија (СОКОМ) и фестивалот „Охридски бисери“. Влезот на сите концерти е слободен.

(Текстот е објавен во „Културен печат“ број 200, во печатеното издание на весникот „Слободен печат“ на 14-15.10.2023)