Престижниот меѓународен фестивал на оперската уметност „Мајски оперски вечери“ традиционално ќе почне на 9 мај, а ќе трае до 31 мај. Во рамките на овој реномиран фестивал ќе се изведат некои од најубавите и најграндиозни оперски и една балетска претстава со настап на реномирани домашни и светски режисери, диригенти, кореографи, оперски и балетски солисти.

Со палењето на фестивалскиот оган во Македонската опера и балет на 9 мај, со почеток во 20 часот, 53-тото издание на фестивалот ќе биде отворено со премиера на една од најубавите музички драми во оперската литература „Риголето“ од Џузепе Верди.

Операта прикажува чувствителна приказна за едно рането татковско срце – тешката несреќа на грбавиот старец Риголето, кој е присилен да игра двојна игра: дворски шут, кој треба да му овозможи забава на својот развратен господар, Војводата од Мантова, наспроти грижлив татко, кој сака да ја сочува својата ќерка Џилда од ниските страсти на општеството.

Балетската класика што ја раскажува вечната борба помеѓу доброто и злото, „Лебедово езеро“ од Петар И. Чајковски ќе биде изведена на 15 мај. Легендата за мистериозната лебед-жена е еден од најромантичните класични балети и се карактеризира со многу елеганција, стил и хармонија. Со познатата, лирска мелодија на Чајковски, „Лебедово езеро“ ја отсликува трагичната љубов помеѓу принцезата Одета и принцот Зигфрид. Ова универзално и волшебно ремек-дело е ода за моќта на љубовта.

На 19 мај ќе биде изведено едно од најголемите ремек-дела на оперската уметност – „Набуко“ од Џузепе Верди. „Набуко“ е третата опера на Верди за којашто се смета дека трајно ја воспоставила неговата репутација како композитор. Со „Набуко“, Верди станува идол на Италијанците, синоним на нивните тежнеења за обединување и почнува една од најубавите и најголеми уметнички кариери што ќе трае 50 години.

Во втората половина на фестивалот ќе бидат изведени две опери од Џакомо Пучини. На 23 мај ќе може да се проследи операта „Мадам Батерфлај“, додека на 27 мај на програмата е „Турандот“. Традицијата ќе биде задржана и на затворањето на 53. „Мајски оперски вечери“ и на 31 мај ќе биде изведена операта „Аида“ од Џузепе Верди.

(Текстот е објавен во „Културен печат“ број 279, во печатеното издание на весникот „Слободен печат“ на 3-4.5.2025)