Деветтото издание на фестивалот за критичка култура „Крик“ завршува на 26 октмоври со настанот насловен „Низ патеките на (не)разумното – 300 години од раѓањето на Имануел Кант“.

Во партнерство со Гете институт – Скопје, „Контрапункт“ му го посветува 26 октомври на Имануел Кант, еден од најзначајните германски филозофи, по повод тристагодишнината од неговото раѓање. Перформативното критичко исчитување на клучните императиви на Кант за етичкото и убавото, беа артикулирани во јавниот простор социо-културно, естетски и политички обележан со интервенцијата наречена „СК2014“ со градската прошетка, чија авторка е Ивана Драгшиќ. „По патеките на (не)разумното“ е нова интерпретација на прошетката низ центарот на градот, позната како „Скопје 2014 – кич тура“. Прошетката се одржа во попладневниот термин на 26 октомври.

Критичкото дијалогизирање со Имануел Кант ќе започне со панел-дискусијата, која ќе се одржи во КСП „Центар-Јадро“, со почеток во 18:30 часот. Панелисти се Јирко Краус (Лајпциг), Рајнер Тоцке (Лајпциг) и Јасмина Поповска (Скопје). Модератор е Артан Садику, а воведничарка е Тијана Ана Спасовска. Во завршницата на настанот ќе настапи музичарот Јордан Костов.

– Кантовата естетика, особено концептите за убавина и возвишено, може да се применат на новите знаменитости воведени од „Скопје 2014“, и воопшто на клучните прашања кои креираат еден јавен, критички и општествен простор. Фундаменталната идеја на Кантовата „критичката филозофија“ е човечката автономија како предуслов за функционалната заедница.

Интердисциплинарниот настан „Низ патеките на (не)разумното“ има за цел да го испита односот помеѓу етиката и естетиката преку Кантовата перспектива, адресирајќи ги современите предизвици со кои се соочуваме во Европа, Балканот и поконкретно Северна Македонија. Токму затоа, во фокусот ќе ги имаме „етиката на единството“, која го нагласува управувањето со различностите додека промовира почит, автономија и заеднички просперитет и „естетика на хармонијата“, која истражува како концептите за убавото и возвишеното можат да поттикнат заедништво во регион кој се карактеризира со културен диверзитет.

Со интегрирање на Кантовите императиви, кои ја нагласуваат слободата на самоопределување и улогата на разумот во етичките размислувања, имаме цел да ја нагласиме неопходноста од почитување на различностите и етичкиот третман на поединците во заедницата, додека се осврнуваме на комплексноста на урбаното планирање и културната политика – истакнуваат од „Крик“.