Фестивалот „Егзит“ заминува од Србија, следната година ќе се одржи во Египет
По 25 години постоење, меѓународниот музички фестивал „Егзит“ го најави своето преселување надвор од Србија и тоа на спектакуларна локација: пред пирамидите во Египет.
Препорачано
Како што потврдија организаторите за неколку регионални медиуми, потпишан е договор со египетска компанија за организација на музички настан кој ќе се одржи токму на оваа историска локација во 2026 година. Целосната презентација на проектот ќе биде објавена по завршувањето на годинешното јубилејно издание во Нови Сад.
Одлуката за преселба, како што велат од фестивалот, не е од комерцијална природа, туку е последица на притисоците што ги доживеале во Србија поради нивната отворена поддршка на студентските протести.
„Откако минатата година јавно застанавме зад студентите и нивната борба за слободно и праведно општество, сме изложени на огромни финансиски и институционални притисоци. Ни беше ускратено секое јавно финансирање, без кое е невозможно долгорочно да се реализира фестивал од вакви размери. Но, не прифаќаме да бидеме замолчени“, порачуваат организаторите.
Поради тоа, 25. издание на фестивалот кое се одржува од 10 до 13 јули на Петроварадинската тврдина, ќе биде последното во Србија. Во духот на протестот, фестивалот се отвора со мултимедијалниот перформанс „Emergency Exit“, симболичен уметнички одговор на ограничувањето на слободата на изразување.
„Иако знаеме дека сме добредојдени во многу делови од светот, на нашата публика ѝ должиме последен танц на Петроварадинската тврдина, поради што целиот наш тим е порешен од кога било да го направи годинашното издание најемотивното и најнезаборавното досега“, рекоа организаторите.
Заминувањето на „Егзит“ од Србија беше проследено и од реномирани светски медиуми како што се Би-би-си и „Гардијан“, а беа поддржани и од главното европско фестивалско здружение „Јуроп“ и бројни светски музички ѕвезди.
Да потсетиме, „Егзит“ е повеќекратно наградуван интернационален фестивал кој секоја година собира над илјада изведувачи и десетици илјади посетители од целиот свет. Основан во 2000 година како студентско движење за мир и слобода, фестивалот низ годините прерасна во симбол на поврзување, отпор и културна размена.
