Новата книга кратки раскази „Зимски сладолед“ од Васил Тоциновски, објавена од „Феникс“, на најдобар начин покажува и докажува оти литературата се вреднува единствено според естетските вредности.

Таа и таквата постапка авторот ја потврди и во својата претходна книга „Грлици“, објавена во 2016 година и закитена со наградата „Крсте Чачански“ на Здружението за литература, култура и наука „Бран“ и списанието „Бранувања“ во Струга.

Книгата „Зимски сладолед“ ја составуваат педесет и седум кратки раскази распослани на сто и дваесетина страници. Нивна тематика се детето и детството сместени во урбан простор и динамично време кои сами по себе создаваат/формираат интересно и интригантно четиво. Секој расказ има сопствени ликови/јунаци, време и простор. Расказите се напишани едноставно и јасно, духовито, со нежност и топлина како мисла и смисла на детето и неговиот свет.

Васил Тоциновски со својата нова книга „Зимски сладолед“ на читателите им дарува книга што нуди интересни согледувања и толкувања за човекот и зборот, времето и просторот со стожерното естетско достоинство на текстот како врвно книжевно правило.

(Текстот е објавен во „Културен печат“ број 105, во печатеното издание на весникот „Слободен печат“ на 13-14 ноември 2021)