Следната трка од новата сезона во Формула 1 шампионатот ќе се вози в недела во Австралија со почеток од 07.00 часот по македонско време. Меѓународната автомобилска федерација (ФИА) денеска соопшти дека во пресрет на трката во Ф1 во Австралија, стартните „боксови“ се проширени за 20 сантиметри, по спорните казни на почетокот на сезоната.

Естебан Окон од „Алпина“ и Фернандо Алонсо од „Астон Мартин“ беа казнети со казна од пет секунди поради лошо заземени стартни позиции. Окон беше казнет на првата трка сезонава во Бахреин, додека Алонсо тоа го направи на последната трка во Саудиска Арабија.

Шпанскиот возач потоа беше казнет во Џеда и казнет со дополнителни 10 секунди по трката (лошо изведено запирање за време на првичната казна), што влијаеше тој да остане без подиумот. Дополнителната казна подоцна беше укината, па Алонсо стигна до 100 подиум во кариерата, додека возачот на „Мерцедес“ Џорџ Расел остана без третото место.

– Мислам дека некои од казните беа престроги. Разбирам зошто постојат овие правила, но треба да се користи малку здрав разум. Има проблем со видливоста во болидот, не можете да ги видите линиите – рече Расел.

Хорнер смета дека другите тимови коваат завера против Ред бул

Поради тоа ФИА одлучи да ги промени правилата, покрај продолжената стартен „бокс“ (2,70 метри), да воведе и централна линија, со цел да им помогне на возачите при паркирање на своите болиди.

По две трки во генералниот пласман води двократниот последователен шампион Макс Верстапен од „Ред Бул“ со 44 бодови, втор е неговиот тимски колега Серхио Перес со бод помалку, додека трет е Алонсо со 30 бодови.