Ракометниот клуб Алкалоид има шанса сезонава да ја круниса со освојување на пехарот во Европскиот Куп на ЕХФ.

Играчите предводени од тренерот Кирил Лазаров во финалето ќе се соочат против АЕК од Грција.

Првиот натпревар е во Атина на 18 мај во олимписката сала „Сунел Арена“.

Реваншот е закажан за 25 мај, а како што стои на сајтот на Европската ракометна федерација (ЕХФ), ќе се игра во Спортскиот центар „Борис Трајковски“ во Скопје.

Алкалоид сите досегашни домашни мечеви во ова клупско натпреварување ги играше во спортската сала Автокоманда и на сите запишуваше победи над Драгунас Клаипеда (Литванија) 42:31, Хандбал Вест Виен (Австрија) 38:27, ССВ Бриксен Хандбал (Италија) 38:31, Минаур Баја Маре (Романија) 32:25 и Рунар Сандефјорд (Норвешка) 42:37.

Алкалоид секогаш имаше одлична поддршка од трибините на споменатите мечеви, а сега истата може да биде уште поголема од навивачите на патот кон испишување историја за клубот и за македонскиот ракомет.