Една нова студија покажа дека неправилно поставената рака за време на мерење на крвниот притисок – дома или во ординација – може да резултира со отчитувања кои се „значително повисоки“ отколку кога раката е во препорачаната положба: правилно потпрена на маса, со манжетната поставена на ниво на срцето.

Ова сугерира дека неправилно поставената рака за време на мерењето на крвниот притисок може да доведе до погрешна дијагноза на хипертензија, што, според експертите, може да резултира со непотребен третман, пишува „Си-ен-ен“ (CNN).

Студијата, објавена во понеделникот во списанието „JAMA Internal Medicine“, покажа дека раката што се потпира на скутот за време на мерењето може да предизвика отчитувањето на систолниот крвен притисок да се прецени за 3,9 mm Hg и дијастолниот за 4 mm Hg. Ако раката виси блиску до телото, систолното читање може да се прецени за 6,5 mm Hg, а дијастолниот за 4,4 mm Hg.

Крвниот притисок се мери во милиметри жива (mm Hg), и се состои од два броја – горниот (систолен) и долниот (дијастолен).

– Здравствените работници треба да се потсетат на важноста од правилно спроведување на овие чекори – рече водечкиот автор на студијата, д-р Тами Брејди, потпретседател за клиничко истражување на Одделот за педијатрија на Медицинскиот факултет на Универзитетот Џон Хопкинс и медицински директор на Програмата за детска хипертензија на Детскиот центар Џон Хопкинс.

– Се надевам дека оваа студија ќе ја подигне свеста за важноста на положбата на рацете за точноста на мерењето на крвниот притисок – додаде таа.

– Исто така, се надевам дека оваа студија ќе ги едуцира пациентите, охрабрувајќи ги да се залагаат за правилно мерење кога се во клиничка средина. Но, и затоа што многу пациенти се потпираат на домашни мерења на крвниот притисок за дијагноза, евалуација и третман на хипертензија, се надевам дека ќе се едуцираат за правилната положба на рацете бидејќи нашите наоди се однесуваат и на домашните мерења – рече Брејди.

Истражувачите од Универзитетот Џон Хопкинс регрутирале 133 возрасни лица од Балтимор, Мериленд, помеѓу август 2022 и јуни 2023 година за да учествуваат во студијата. На учесниците, на возраст од 18 до 80 години, по случаен избор им бил мерен крвен притисок во три различни положби на рацете: на маса (препорачана пракса), во скут или висење покрај телото, без поддршка.

Секој учесник имал вкупно 12 мерења на крвниот притисок во сите три позиции на рацете.

Помеѓу учесниците, кога нивните раце стоеле на масата како што е препорачано од клиничките упатства, просечниот крвен притисок бил 126/74. Но, кога нивните раце се потпирале во скут, просечното отчитување било 130/78, а кога рацете им виселе од страна, просечното отчитување било 133/78.

– Не очекував толку голема разлика кога рацете беа во две алтернативни позиции. Ги тестиравме овие позиции затоа што тие се позиции во кои повеќето луѓе го мерат својот крвен притисок, според податоци и лични набљудувања. Очекувавме разлика, но ме изненади колку таа беше значајна – изјави Брејди.

Научниците напишаа дека постојат неколку физиолошки причини зошто неправилно поставената рака може да предизвика погрешно отчитување на висок крвен притисок. Поголемото вертикално растојание помеѓу срцето и местото на поставување на манжетната може да го зголеми хидростатичкиот притисок во артериите поради влијанието на гравитацијата, што доведува до преценето отчитување на крвниот притисок. Исто така, неподдржаната рака може да предизвика контракција на мускулите, што може да го зголеми крвниот притисок.

Новите наоди се во согласност со претходните истражувања кои покажаа дека положбата на раката под нивото на срцето може да ги прецени отчитувањата на крвниот притисок.