Европската комисија планира да воведе забрана за увоз на руски течен природен гас (ЛНГ) од 1 јануари 2027 година, една година порано од првично планираното, и тоа би бил дел од 19-тиот пакет санкции против Москва.

Комисијата, исто така, разгледува посебен „заем за репарација“ за Украина што би се обезбедил со користење на приходи од замрзнати руски средства, објави Ројтерс.
Според комесарот за економија, Валдис Домбровскис, идејата е да ѝ се обезбеди на Украина финансиска поддршка во време кога американскиот претседател Доналд Трамп ја намалува директната воена помош за Киев.

Околу 300 милијарди долари руски средства се блокирани во земјите од Групата седум (Г7), а најголемиот дел е во Белгија, каде што клириншката куќа „Еуроклеар“ држи дури 194 милијарди евра. Дел од овие средства веќе се конвертирани во готовина.

Предлогот предвидува Европската комисија да издава обврзници без купон, со гаранции од земјите членки.

Сепак, Белгија предупредува дека планот носи значителни ризици и бара тие да бидат поделени меѓу сите членки на ЕУ.

Големината на заемот ќе биде одредена и од проценката на Меѓународниот монетарен фонд (ММФ) за потребите на Украина за следните две години.

ММФ прогнозира дека финансиските потреби на Украина во периодот 2026-2027 година ќе бидат од 10 до 20 милијарди долари повисоки отколку што проектирала владата во Киев.

Иако Украина верува дека обезбедувањето 37,5 милијарди долари во текот на следните две години е доволно, ММФ проценува дека бројката би можела да достигне до 57,5 ​​милијарди долари, објави Блумберг, повикувајќи се на анонимни информирани извори.