Претседателите на Турција и Русија, Реџеп Таип Ердоган и Владимир Путин, денеска разговараа телефонски за повеќе прашања – меѓу нив и ситуацијата во Украина, Сирија, како и за билатералната соработка меѓу двете земји, пренесува ТАСС.

Како што соопшти кабинетот на турскиот претседател, Ердоган нагласил дека е важно што поскоро да се започне третата рунда директни преговори меѓу Русија и Украина и изразил подготвеност Турција повторно да биде домаќин на тие разговори во Истанбул, штом двете страни се договорат за соодветен датум.

„Претседателот Ердоган посочи дека Турција ќе продолжи да ги поддржува мировните напори и ќе го понуди Истанбул како место за идните преговори“, се наведува во соопштението.

Во разговорот, турскиот лидер се осврнал и на состојбата во Сирија. Изразил загриженост поради судирите кои избија по повлекувањето на сириските безбедносни сили од областа Ас-Сувајда, оценувајќи дека тие конфликти претставуваат закана за поширокиот регион.

„Ердоган истакна дека е од суштинско значење Израел да не го нарушува сирискиот суверенитет и дека Турција е посветена на обезбедување стабилност и безбедност во Сирија, како и на нејзино што побрзо закрепнување“, се додава во соопштението.