Елвис Присли, кралот на рокенролот, беше музичка легенда чиј живот беше исто толку бурен колку и неговата кариера. Роден на 8 јануари 1935 година, доколку беше жив денеска ќе го прославеше својот 90. роденден, пишува „Стори“.

Тој почина на 16 август 1977 година од срцев удар, на 42-годишна возраст, по долгогодишни здравствени проблеми. Се бореше со прекумерна тежина, дијабетес и гастритис, а беше и зависен од лекови и дрога.

Покрај музичката кариера во која остави безвременски хитови како „Can’t Help Falling in Love“, „Suspicious Minds“ и „You’re the Devil in Disguise“, Присли беше познат и по својот бурен љубовен живот. Имаше само една официјална сопруга, Присила Присли, со која се ожени во 1967 година и ја доби ќерката Лиза Мари. Сепак, нивниот брак не траеше долго и се разведоа во 1973 година.

Но, Присли не бил човек кој останува сам. Познат по својот шарм, тој привлекувал многу жени, а неговиот љубовен живот бил исполнет со афери, тајни средби и контроверзии. Од младешките авантури со девојки многу помлади од него до бурните ноќи во неговата вила во Палм Спрингс, пејачот секогаш бил опкружен со женска убавина.

Според авторот Џоел Вилијамс во книгата „Елвис Присли: јужен живот“, Присли не бил премногу самоуверен во спалната соба. Сепак, тој знаел како да заведе жена и ѝ создавал илузија дека ѝ е целосно посветен. Некои сведоштва сугерираат дека во неговите најбурни години организирал приватни забави покрај базенот, но неговата сопруга никогаш не била поканета.

Една од најконтроверзните информации поврзани со Присли е неговата склоност кон многу млади девојки. Присила имала само 14 години кога се запознале, додека тој бил 10 години постар. Во своите кругови, се зборувало дека Присли претпочитал девици и дека дури одбил врска со актерката Натали Вуд, сметајќи дека со нејзини 18 години е веќе „премногу возрасна“ за него.

Неговата последна љубов била Џинџер Алден, која била покрај него во последните месеци од неговиот живот. Таа била и личноста која го пронашла мртов во бањата на Грејсленд, по консумирање на прекумерна количина лекови.