Легендарниот музичар Елтон Џон ѝ се извини на Мадона по долги години недоразбирања, а нивното помирување се случи зад сцената на популарната емисија „Saturday Night Live“, каде што Џон беше музички гостин.

По помирувањето, Мадона сподели нивна заедничка фотографија на Инстаграм и напиша дека цел живот била негова обожавателка. Се потсети дека уште во средно училиште се искрала од дома само за да оди на негов концерт.

„Конечно ја закопавме секирата! Бев на настапот на Елтон Џон во ‘SNL’ овој викенд. Се сеќавам дека во средно училиште тајно заминав на негов настап во Детроит. Тоа беше незаборавно искуство кое ми помогна да ја разберам трансформативната моќ на музиката. Да го видам на сцена ми го смени текот на животот. Како дете што често се чувствуваше како аутсајдер, тој настап ми покажа дека е во ред да бидеш различен – дека е во ред да одиш по својот пат“, напиша Мадона.

Таа призна дека многу ја повредиле јавните критики на Џон и изјави дека не можела да го разбере тоа.

„Кога ми рекоа дека Елтон е музички гостин во емисијата, решив да одам. Знаев дека морам да го сретнам. И кога го видов, првото нешто што ми го рече беше: ‘Прости ми’. И тоа беше моментот кога ѕидот меѓу нас падна“.

Само неколку минути подоцна, се прегрнале и си простиле. Џон дури ѝ признал дека напишал песна за неа и дека сака да соработуваат.

Расправијата меѓу нив траеше повеќе од две децении. Сѐ започна кога Џон во 2002 година ја нарече песната на Мадона „Die Another Day“ – најлошата „Бонд“ тема некогаш. Две години подоцна, на доделувањето на Кју наградите, Џо отворено ја нападна Мадона која беше номинирана за најдобра изведба во живо.

„Мадона? Најдобра изведба во живо? Од кога е пеењето на плејбек ‘во живо’? Треба да се срамат. Луѓето плаќаат за да слушаат вистински настап, не лажен,“ рече тогаш Џон.

Тензијата продолжи и во 2012 година, кога сопругот на Џон, Дејвид Ферниш, јавно ја искритикува Мадона откако таа го освои Златниот глобус за најдобра оригинална песна – во категорија каде беше номиниран и Џо. Тогаш Ферниш изјави дека „нејзината победа покажува дека наградите немаат никаква врска со заслугите“.

Џон во неколку наврати ја обвинуваше дека ѝ наштетува на Лејди Гага и дури ја нарече „ноќна мора“ и „стриптизета“, додавајќи дека ѝ е завршена кариерата.

„Турнејата ѝ беше катастрофа. Требаше само да биде тоа што е – брилијантна поп пејачка“, велеше тој.

Сепак, и покрај сите обвинувања и навреди што ги разменуваа низ годините, двајцата успеаја да најдат заеднички јазик. Сега изгледа дека не само што се помирија, туку и дека на повидок е музичка соработка каква што светот досега не видел.