Македонската фудбалска репрезентација веќе во групната фаза го заврши настапот на Европското првенство, но и натаму нашите фудбалери добиваат признанија од странските медиуми.

Горан Пандев кој ја заврши репрезентативната кариера се најде во идеалниот тим од групната фаза на ЕП во изборот на шпанската „Марка“, а Езџан Алиоски според читателите на „Би-Би-Си Спорт“ се најде меѓу најдобрите 11 играчи после групите.

Порталот „90min.com“ се погрижи да објави идеален тим од 11 фудбалери кои доаѓаат од „екс-ју“ просторите за Европското првенство. Изворот одвои и играчи од земји кои не обезбедија настап на континенталниот собир.

Во тимот се наоѓа и една од најголемите македонски фудбалски надежи Елиф Елмас, членот на Наполи, за кој се вели дека многу често може да направи разлика на теренот. Имаше 33 настапи минатата сезона во Серија А и полека се развива во голем играч, иако елиминиран од ЕП, се очекува да биде уште посилен во иднина.

Покрај Елмас, во идеалниот „екс-ју“ тим за Евро 2020 се наоѓаат уште: Јан Облак (Словенија), Никола Миленковиќ (Србија), Стефан Савиќ (Црна Гора), Дује Чалета-Цар (Хрватска), Јосип Иличиќ (Словенија), Лука Модриќ (Хрватска), Миралем Пјаниќ (Босна и Херцеговина), Лука Јовиќ (Србија), Един Џеко (Босна и Херцеговина) и Душан Влаховиќ (Србија).

ФОТО: Алиоски во идеалниот тим по групната фаза на ЕП според „Би-Би-Си Спорт“!