Елена Ристеска го освојува регионот: Вечерва ќе настапи на црногорскиот избор за песна на Евровизија со песната „Мука ми је“
Македонската пејачка Елена Ристеска вечерва ќе настапи во ревијалниот дел на црногорскиот избор за песна на Евровизија – „Монтесонг 2024“.
Препорачано
По долга пауза од музичката сцена, Ристеска неодамна учествуваше на годинашното издание на фестивалот Макфест со песната „Ме боли за сè“, а вечерва ќе ја претстави и српската верзија на оваа нумера, која е насловена „Мука ми је“.
„Вечерва, во 20 часот, ќе настапам на црногорскиот избор за песна на Евровизија со мојата нова песна ‘Мука ми је’, која е препев на песната ‘Ме боли за сè’. Пуштете РТЦГ за да ги погледнеме сите учесници и уживајте“, најави нашата музичка дива на својот инстаграм-профил.
Да потсетиме, вечерва Црногорците ќе го изберат својот преставник на 69. издание на Изборот на песна за Евровизија, кој ќе се одржи од 13 до 17 мај во Базел, Швајцарија. На „Монтесонг 2024“ ќе настапат 16 изведувачи, а главен фаворит за победа е пејачката Нина Жижиќ и нејзината песна ,,Добредошли”.
Елена Ристеска ја претставуваше Македонија на Евровизија во 2006 година, кога со песната „Нинанајна“ го освои 12. место во финалето. Сè до во 2019 година, кога Тамара Тодевска се искачи на високото 7. место со песната „Proud“, ова беше најголем успех за нас на Евровизија.
