Болестите на срцето и крвните садови се водечка причина за смрт во светот. Во Европа, околу четири милиони луѓе годишно умираат од кардиоваскуларни болести.

Кардиоваскуларните болести вклучуваат, на пример, коронарна болест на срцето која може да доведе до затајување на срцето (инсуфициенција) и срцев удар, мозочен удар и болести на периферните артерии. Ако не се откријат и не се лекуваат рано, кардиоваскуларните болести можат да бидат фатални. Затоа, воочувањето на сите предупредувачки знаци е од витално значење.

Некои симптоми на срцевите болести се мошне познати, како што е болката во градите. Меѓутоа, постојат и знаци кои можат да се појават на неочекувани места. Говорејќи на поткастот Зои, стоматологот Алпф Кантарци предупреди дека болестите на непцата и лошото здравје на забите воопшто може да го зголемат ризикот од кардиоваскуларни болести, пишува британски „Мирор“.

Ова се случува затоа што болестите на непцата и нивното влијание врз цревните микроби и телото воопшто, го поттикнува воспалението, што го става телото под голем притисок.

– Повеќето кардиоваскуларни или срцеви болести се резултат на состојби во вашите крвни садови, најчесто затнувања во аортата, главниот сад кој излегува од вашето срце и дистрибуира крв – објаснил д-р Кантарци.

– Кога ги лекувате болестите на непцата, го намалувате оптоварувањето со бактериите, но и воспалителното оптоварување на вашето тело – додал стоматологот.