Македонскиот експериментален филм „Лима“ во режија на Батухан Ибрахим, годинава беше селектиран на „Short Film Corner“ на Канскиот филмски фестивал. Филмот ќе има и својата затворена проекција во Кан наменета за филмски дистрибутери и филмски селектори. Проекцијата е закажана за среда, 21 мај, во рамки на „SFC | Rendez-vous Industry“ на 78. издание на фестивалот.

„Лима“ е експериментален филм кој го следи патувањето на три силуети низ времето, низ просторот на поранешна Југославија, низ урнатини од заборавени спомени и скршена надеж. Играјќи си со спомените, минатото и трансформативната моќ на она што било и може да биде, филмот прикажува една дисторзирана перцепција на просторот, телото и времето. Препуштајќи се на ритамот на минатото, трите тела будат еден исчезнат, замрзнат во времето, свет кој пркосно одбива целосно да избледе од сеќавањето.

Батухан Ибрахим е филмски режисер и сценарист, магистер по филмска и ТВ режија при Факултетот за драмски уметности – УКИМ. Неговото творештво опфаќа кратки играни, експериментални и документарни филмови. Неговиот студентски филм „Twisted“ (2020) е прикажан на повеќе од 20 интернационални фестивали и е добитник на осум награди.

Независниот филм „Мавера“ (2023) доби специјално признание на ИФФК „Браќа Манаки“ и беше дел од неколку реномирани фестивали, вклучувајќи ја и официјалната селекција на филмскиот фестивал во Тирана. Во моментов работи на својот прв долгометражен игран филм, како и на неколку нови краткометражни проекти.

Во креативниот тим на филмот „Лима“, покрај режисерот Батухан Ибрахим, кој е и продуцент, се и Јасмина Билаловиќ и Ивана Балабанова како продуценти, копродуценти се Апофенија Пост и Стефан Ѓорѓиевски, директор на фотографија е Стефан Ѓорѓиевски, кореографијата е на Ивана Балабанова, асистент на режија е Марија Бошковска, а играат танчерките Тереза Лазарев, Стефани Шааршмит и Софи Ларсон. Костимите ги креираа Ивана Балабанова, Снежана Чоловиќ и Маја Ѓуреска, шминката е на Павел Маслов, фотографииите на сет ги направи Ања Калин, а видео на сет овозможи Мартин Михајлов („Марсбен продукција“).

Филмот е во продукција на КЦ „Медиа артес“, „Зенит Продукција“ и „Танц Бункер“. Проектот е реализиран со поддршка на Амбасадата на Швајцарија во РСМ и Агенцијата за развој и соработка на Швајцарија, Министерството за култура и туризам на Република Северна Македонија, „Битрикс Културен Центар“, НУЦК „Григор Прличев“ – Охрид.