Експериментален видео театарски проект премиерно ќе биде прикажан во КИЦ-Скопје
Македонскиот центар ИТИ/Продукција во партнерска соработка со ЈУ КИЦ-Скопје на 2 јули, во 20:30 часот, премиерно ќе го прикаже експерименталниот видео театарски проект „Krieg / A-c-i-n-s-e-l-a-k“ (2024). Во видеоперформансите играат актерите Здравко Стојмиров и Филарета Атанасова, а режијата е на Иванка Апостолова Баскар.
Препорачано
Експерименталниот видео театарски диптих, поделен на „Krieg – Машка верзија – Војник во агонија“ и „A-c-i-n-s-e-l-a-k – Женска верзија – Војник во агонија“ е структуриран во неколку дејствени целини: војник – машина, војник – човек, војна (krieg), ескапизам – калесница, смрт, епитафи и постелегиска состојба на телото и душата.
Двата лика (двајца војници во агонија) се во огледални дејства, низ апстрактна нарација за класични воени конфликти исполнети со јунаштво, илузија, агон, страв, бес, лутина, повреда, болка, страдање, разурнување, шок од гранатирање, занемарување на виталноста, умртвена копнеж и романса, запечатен живот и смрт.
Инспирацијата потекнува од архајско-феминистичка поетска книга „Калесница“ од Светлана Христова (1970); гробни епитафи на Британски воени гробишта Скопје; воени гробишта од Првата светска војна (Големата војна) – ирски, германски, британски, српски, грчки и бугарски – лоцирани во Битола, Скопје, Прилеп, Скочивир, Цапари, Добровени, Валандово. Проектот е снимен на Германски воени гробишта од Големата војна во Битола.
Во продукција на Македонскиот центар ИТИ/Продукција во екипата што го реализираше проектот се Иванка Апостолова Баскар (адаптирано сценарио, продукција, режија, визуелно сценарио), Михаило Апостолов (камера, монтажа, звук), Луна Шаламон (експериментални цртежи – комбинирана техника и лекови во течна состојба) и Весна А. Бришкоска (фотографии).
Покровители на проектот се Е.Т.Е.Р.И.А. / Креативна Европа и Министерството за култура на РС Македонија (малцински удел); Град Скопје – КИЦ-Скопје (дел од програмата за Драмска дејност).
По проекцијата ќе следи дискусија со екипата (Здравко Стојмиров, Филарета Атанасова и Иванка Апостолова Баскар) модерирана од куратор/кустос Владимир Јанчевски.
