Економската криза што ги зафати сите сфери на живеењето, ја чувствуваат и oпштините. Во обид да ги реализираат сите дадени ветувања пред граѓаните, но и да обезбедат средства за тековните трошоци што ги имаат кон вработените, но и кон граѓаните, но и да им излезат во пресрет на одредена категорија жители што имаат потреба за помош, тие со штедење се обидуваат да обезбедат средства за реализација за да ги задоволат потребите на сите.
– Следејќи ја состојбата на огромна економска криза што секојдневно се продлабочува, Општина Кисела Вода презема низа мерки со кои ќе им го олесни финансискиот товар на своите жители. Распишавме јавен повик до сите социјално загрозени семејства, кои ќе можат да ​користат субвенција од општината за дел од сметките за електрична енергија. Преку донација од приватна компанија, Општина Кисела Вода за оваа мерка обезбеди 1.200.000 денари, односно по 100.000 денари во текот на дванаесет месеци наменети на ранливите категории – социјално загрозени семејства, самохрани родители и деца без родители – велат од Општина Кисела Вода.
Дополнително, од оваа локална самоуправа потсетуваат и дека имаат обезбедено ранчиња и училиштен прибор за сите 625 првачињата, со што исто така ќе им помогнат на родителите да го подготват своето дете за првиот училиштен ден, а најавуваат дека и во наредниот период ќе продолжи проектот „Храна за сите“, преку кој се обезбедуваат хуманитарни пакети за економски немоќните семејства.
Кога станува збор за начинот на штедење, од локалната самоуправа информираат дека Општината веќе 9 месеци работи по нов економски план, кој обезбедува заштеди на финансии неопходни за нормално работење, поради наследениот долг од претходното раководство во висина од 3 милиони евра.
-Се скратија сите непродуктивни трошоци. Службените автомобили се користат исклучиво за службени цели и само во работно време. Градоначалникот вози сопствено возило. Се направи анализа каде имало непотребни и нереални расходи во поглед на употребата на канцелариски материјали. Само како илустрација, за фотокопирање на една страница, кое општината во претходните четири години го плаќала неверојатни 1,8 денари, сега се плаќа по 0,15 денари. Економската состојба во Македонија будно се следи и во периодот што е пред нас ќе се преземаат и други мерки за да се заштедат средства. Она што е важно е дека добро се менаџира со затекнатата и новонастанатата ситуација, предвидените проекти течат и програмата на градоначалникот ќе биде реализирана – информираат од Општина Кисела Вода.
И од Општина Центар велат дека досега добро се справуваат со економските предизвици предизвикани од моменталната криза, која освен нас, го зафати и целиот свет.
-Се кратат непродуктивните трошоци и средствата се пренаменуваат за активности и прашања што директно ги засегаат нашите жители, особено оние од семејствата со висок социјален ризик. По донесувањето на ребалансот на една од наредните седници на Советот на Општина Центар, сликата за трошењето и менаџирањето со буџетските средства ќе биде појасна. Досега општината успешно ги спроведува програмите за работа на општинските сектори согласно предвидената динамика – велат од Општина Центар.
Оттаму појаснуваат и дека тие како локална самоуправа ќе продолжат и понатаму со помош и поддршка на сите граѓани од социјално ранливите категории.
-Во соработка со невладината „Банка за храна“ секој месец 150 семејства со висок социјален ризик добиваат пакети со основни прехранбени и хигиенски производи. Во соработка со невладината организација „Хуманост“, општината обезбедува услуги и на старите, болни и изнемоштени лица, трипати во неделата по два часа. Општината обезбедува образовни асистенти на учениците со посебни образовни потреби, Советот доделува еднократна помош на наши сограѓани што имаат потреба од финансиски средства за лекување, но дополнително, надлежните служби во општината изнаоѓаат и други начини со кои ќе им се помогне на овие наши сограѓани – информираат од Центар.
Од Општина Карпош, пак, потенцираат дека, иако ранливите категории граѓани по закон се обврска на Министерството за труд и социјална политика, а не на локалната самоуправа и, како што велат, таа ингеренција сѐ уште не е префрлена на општините, сепак Општина Карпош секоја година издвојува по 3 милиони денари за поддршка на социјално загрозените лица.
-Во општината откако сум дојден користам сопствен мобилен телефон, многу ретко го користам службеното возило и возачот. Не се исплаќаат дневници за службени патувања и трошоци за репрезентации. Одлучивме да штедиме на потрошувачката на електрична енергија за улично осветлување. Затоа работи секоја втора светилка. Знам дека оваа наша мерка наиде на негодување кај дел од граѓаните, но вие гледате дека веќе во градови во Германија од 1 септември улично осветлување ќе има само до 23 часот навечер. Ова јасно покажува дека кризата сме ја антиципирале однапред и на време сме преземале мерки за штедење – објаснува градоначалникот Стевчо Јакимовски.
И од скопската Општина Ѓорче Петров објаснуваат дека во голема мера ги намалиле тековните расходи во Општината.
-Од извршената анализа може да се утврди дека во периодот од 1 јануари до 30 јуни 2022 година, споредбено со истиот период во 2021 година, извршено е намалување на вкупните расходи на општината во износ од 13.409.000 денари – информираат од Општината.
Оттаму велат и дека, во моментов, Секторот за финансиски прашања во соработка со останатите организациски единици во рамките на Општина Ѓорче Петров, работи на подготовка на предлог-измени и дополнувања на буџетот за 2022 година (втор ребаланс), со кој се планираат одредени измени и кратења во буџетот на Општината во согласност со процентот на остварените приходи и обезбедените средства, а предлог-измените и дополнувањата на буџетот за 2022 година е планирано да се достават до Советот на Општина Ѓорче Петров во септември.
Од Општината потсетуваат и дека исплаќаат парична помош за семејствата на новороденчињата, а им помагаат и на граѓаните што не се во можност да си набават огревно дрво.
-Според буџетот на Општина Ѓорче Петров за 2022 година, за овие намени се планирани 3.350.000 денари и исплатата на овие средства ќе продолжи во согласност со поднесените барања од граѓаните и утврдените критериуми во Правилникот за исплата на еднократна парична помош – информираат од оваа скопска општина.