Европската комисија избра 24 проекти кои ќе градат нови или ќе ги прошират постојните програми за собирање крвна плазма од донатори кои се излекувале од Ковид-19, соопшти ЕК.

Донациите ќе одат за лекување пациенти заразени со коронавирусот. Грантот се доделува откако беше испратена покана до сите јавни и некомерцијални услуги за трансфузија на крв во ЕУ во јули минатата година да аплицираат за финансирање за набавка на потребната опрема за собирање на реконвалесцентна плазма.

Парите, 36 милиони евра, доаѓаат од Инструментот за итна помош.

Проектите што треба да се спроведат во 14 земји-членки и Велика Британија се национални или регионални и во повеќето случаи вклучуваат доделување средства на голем број локални центри за собирање крв или плазма (вкупно над 150). Четиринаесетте држави се – Белгија, Бугарија, Хрватска, Данска, Финска, Франција, Германија, Ирска, Италија, Полска, Португалија, Романија, Шпанија и Словенија.

Грантот ќе поддржи купување голем број машини за плазмафереза ​​и соодветна опрема, вклучувајќи комплети за собирање, опрема за складирање, лабораториски тестови и карактеризација на плазма. Тие се исто така за организациски промени во такви центри.

Третманот вклучува трансфузија на рековалесцентна плазма на болни пациенти за да се зајакне нивниот имунитет и способност да се борат против вирусот.