Откако работната група за измена на Уставот две недели не можеше да се усогласи за мандатот што им е зададен, односно дали освен измена на Преамбулата за внес на Бугарите и на други заедници, треба и за други прашања да чепка во највисокиот правен акт, како што е промената на формулацијата „20 отсто“ со „албански јазик“, денеска конечно го донесе Деловникот за работа. Подготовка на нацрт-амандманите на Уставот како обврска Македонија да го продолжи евроинтеграцискиот пат е мандатот на работната група, децидна е претседателката на работното тело Маргарита Цаца Николовска. Како што дознава „Слободен печат“ од членови на работната група, со ова се согласиле и членовите Албанци, но и дека тие не отстапуваат ако има простор, сепак, во пакет со Бугарите, бараат Уставот да претрпи измени и во делот на замена на „20 отсто“ со „албански јазик“.

„Деловникот едногласно е донесен. Го оценувам како добар, како основа што дава можност за се она што ние треба понатаму да работиме, без да влегуваме во некои дискусии коишто ќе ја одолговлечат работата, а немаме многу време. Ние рокови немаме зацртано, но она што е важно е дека треба да се имаат предвид апсолутно сите можности што треба да ги искористиме за да може меѓународната заедница да продолжи да работи согласно нивната агенда во којашто ние влегуваме“, изјави Николовска.

Таа повтори дека работната група има мандат да работи само по заклучоците на Собранието, одлуката на Владата, решенијата на Министерството за правда поврзани со европскиот предлог и Преговарачката рамка за продолжување на процесот на пристапување кон ЕУ и целта е да се даде предлог колку е можно поскоро, со цел државата да може да ги презентира резултатите што ги има преземено од меѓународната заедница.

Николовска вели дека засега работната група нема да отвора други прашања, дека надлежноста на групата е да се издрафтира нацрт-документот и да се достави до предлагачот, кој потоа ќе го достави до Собранието.

На прашањето дали ќе се отвори темата за замена на „20 отсто со „албански јазик“, Цаца Николовска рече дека мандатот на членовите на работната група не е неограничен, туку е во насока на европскиот предлог за продолжување на евроинтегративниот процес.

Претседателката не прецизира колку нацрт-амандмани ќе подготват, но вели дека е потребно да донесат аргументирани одлуки, кои ќе им бидат понудени на граѓаните, но и на одредени политички личности и на одредени лица што биле повикани да бидат дел од групата, но за жал одбиле.

„Ќе се расправа комплетно за целиот Устав од она што ќе влезе во Преамбулата секако дека ќе има рефлексија и во нормативниот дел. Ќе се интервенира во Преамбулата, во Комитетот на заедниците, како и во одредени амандмани“, вели претседателката на работната група.

Членови Албанци на работната група, но и министерот за правда Кренар Лога, иако најавуваа дека ќе се отвораат и други прашања од Уставот, ја прифатиле методологијата дека приоритет е промена на Преамбулата. Сепак, тие не се откажуваат дека и формулацијата албански јазик сега треба да биде дел од промената на Уставот.

Од работната група брифираат дека в петок, за кога е закажан следниот состанок, веќе треба да подготват нацрт-текст за Преамбулата и да почне суштинската расправа. Оттаму се надеваат дека ако ја забрзаат работата ќе успеат и албанскиот јазик да го протнат во Уставот. Стравувањата се дека работата може да се закочи ако се инсистира и Торбешите да влезат во Преамбулата, на што се спротивставуваат Турците.