Поранешниот капитен на Ливерпул и англиската репрезентација Стивен Џерард, е блиску до враќање на клупата на Ренџерс, каде што веќе помина еден одличен период. Според британските медиуми, преговорите меѓу двете страни се веќе започнати, а разврската се очекува во текот на денот.

Гигантот од Глазгов синоќа го отпушти Расел Мартин, кој имаше катастрофален старт на сезоната. Ренџерс се наоѓа на разочарувачката осма позиција со само осум бода по седум кола и негативна гол-разлика од 6:7. Последниот удар беше ремито против Фалкирк, натпревар во кој Ренџерс водеше со 1-0 по голот на македонскиот напаѓач Бојан Миовски, но не успеа да ја задржи предноста.

Џерард веќе еднаш го водеше Ренџерс од 2018 до 2021 година и во последната сезона ја донесе долгоочекуваната титула во шкотската Премиер лига и тоа без ниту еден пораз, па поради тоа и навивачите посакуваат да се врати.

Во овој момент тој е без ангажман, а последниот го имаше во Ал Етифак во Саудиска Арабија од каде што замина во јануари.

Преземено од: Спорт.ком.мк