Италијанскиот тренер Џенаро Гатузо својот мандат на клупата на хрватскиот фудбалски клуб Хајдук го заврши со победа од 1:0 против Шибеник.

Сезоната ја заврши на третото место во најдобрата хрватска лига, иако Гатузо минатото лето потпиша договор на две години со Хајдук, истиот според најавите нема да го одработи до крајот.

Италијанските медиуми шпекулираат дека новиот тренерски ангажман Гатузо ќе го има во Торино каде на позајмица настапува македонскиот репрезентативец Елиф Елмас од редовите на Лајпциг.

Клубот сè уште не донел одлука за иднината на тренерот Паоло Ваноли, а притисокот расте откако ја заврши сезоната на 11 место со 44 освоени бодови.

Покрај Гатузо, потенцијални наследници се Марко Барони, Маурицио Сари, Еузебио Ди Франческо – кој испадна од лигата со Венеција – и Паоло Занети, кој успеа да ја задржи Верона во елитата и кој добро го познава Торино, каде што помина четири сезони.