Џејми Ли Кертис важи за една од најпознатите актерки во светот, а и по повеќе од 40 години кариера, продолжува да реди успеси. Првиот Оскар го освои пред две години за улогата во филмот „Сè во исто време“ (Everything Everywhere All at Once), а неодамна се врати во една од нејзините највпечатливи улоги од 2003 година.

Повеќе од две децении подоцна, таа повторно ја толкува улогата на д-р Теса Колман од филмот „Откачен петок“ (Freaky Friday), сега во новото продолжение со наслов „Уште пооткачен петок“ (Freakier Friday), каде што нејзината ќерка Ана (Линдзи Лохан) е и мајка на Харпер (Џулија Батерс). Одлуката да се сними продолжение ја донела токму Кертис, која самата го продуцирала филмот, го предложила сценариото и ја ангажирала Лохан, со која останала блиска изминативе 20 години.

„Сè почна додека го промовирав последниот ‘Ноќ на вештерките’ (Halloween). Каде и да патував, едно прашање постојано се повторуваше – дали ќе има нов ‘Откачен петок’? Беше јасно дека луѓето го обожаваат тој филм. Им велев: ‘Линдзи треба да биде доволно возрасна за да глуми мајка на тинејџерка’. Некој ми рече: ‘Па таа има 35’. Помислив – јас сум можела да родам дете на 20 години. Колку забавно! И веднаш ги повикав луѓето од ‘Дизни’ и им реков: ‘Време е’“, изјави Кертис за „Ел паис“.

Филмот е ретка семејна комедија на денешниот пазар, со четири жени во главните улоги, при што Лохан глуми самохрана мајка по сопствен избор, а Кертис е баба која ѝ е поддршка. Тоа, според Кертис, испраќа силна феминистичка порака.

„Многу жени кои се одлучуваат на ваков чекор немаат поддршка од семејството. И многу не го прават токму поради тоа. Само таа вистина е феминистичка изјава. Филмот го продуцираа жени, го напишаа жени, го режираа жени и го глумат претежно жени“, нагласува таа.

Кертис вели дека е среќна што жените сѐ повеќе се вклучени во филмската продукција: „Овој филм пренесува чувство дека и проект насочен кон жените може да се реализира во индустрија во која сѐ уште доминираат мажи“.

Актерката признава дека ситуацијата во индустријата се подобрила од нејзините почетоци, кога жени речиси и да немало.

„Имаше шминкери, неколку жени во костимографија, но не и дизајнери, техничарки или режисерки. Сето тоа се менува. Бавно, не толку брзо колку што би сакала, но се менува“, вели таа.

Позната и како гласна борка за општествени промени, Кертис не се плаши јавно да ги изрази своите ставови, вклучувајќи ја и нејзината критика кон Доналд Трамп. Таа отворено се спротивстави на неговата победа на изборите и повика на политичка активност: „Разбудете се и борете се“, изјави тогаш, а и денес стои зад таа изјава.

„Требаше одамна да станеме и да се бориме. Америка е создадена од борба. Живееме во земја каде што можеме да се бориме политички – преку гласање, поддршка на кандидати и спротивставување на авторитарни режими. Ќе мора сѐ почесто да излегуваме на улица, како што тоа го прават луѓето ширум светот“, порача таа, додавајќи дека ќе треба повторно да се водат битки – за граѓански права, за правата на жените, за трансродовите луѓе и за истополовите бракови.

„Ќе се обидат да ни ги одземат тие права. Ќе мора да се бориме за нив“, цврсто порачува Џејми Ли Кертис.

ФОТО+ВИДЕО | Линдзи Лохан за Џејми Ли Кертис: „Таа беше тука за мене кога ми беше најтешко!“