Фудбалерите на Реал Мадрид доживеаја уште една шлаканица од Барселона, а девет гола во 180 минути против најголемиот ривал вклучи секакви аларми. Одредени извори откриваат дека во Реал Мадрид работите не одат според планот и атмосферата е прилично лоша.

Имено, неколку играчи во соблекувалната на „кралскиот“ клуб се незадоволни од односот на тренерот на екипата Карло Анчелоти кон поединци. Тие сметаат дека Анчелоти е премногу „мек“ и попустлив кон некои од ѕвездите на тимот, додека со други „тренира сериозност“.

Иако имињата не беа откриени, се верува дека Анчелоти е особено „претпазлив“ за Винисиус Жуниор и Килијан Мбапе. Но, не завршува тука, бидејќи некои играчи и нивните агенти сметаат дека голема одговорност има и претседателот на клубот, Флорентино Перез.

Тие сметаат дека Перез не направил доволно на трансфер пазарот и дека клубот морал да реагира и да доведе засилување поради бројните проблеми во составот. Некои извори тврдат дека на многумина им е нејасно зошто Перез упорно одбива да донесе замени за Карвахал и Милитао кои ја завршија сезоната, а евидентно е дека тимот се мачи и уназадува без нив.

Зад сето тоа се крие опсесивноста на Перез кон финансиската стабилност и неговата експлицитност дека не сака да „преплаќа“ за одредени цели. Најдобар пример е овогодинешната сага околу Лени Јоро, кој на крајот реши да го избере Манчестер јунајтед, иако ги договори сите услови со Реал Мадрид.

И третиот голем проблем за играчите е – физичката исцрпеност. Познато е дека Реал има многу проблеми со повредите, а очигледно е дека играчите веќе немаат доверба во работата на кондицискиот тренер Пинтус. Покрај проблемите со бројните повреди, поединците чувствуваат и дека нивното опоравување е слабо и дека не се доволно свежи од натпревар во натпревар.

Нештата да бидат уште полоши, за сето ова пишуваа прилично сигурни извори и не е првпат да се отвораат овие теми, особено кога станува збор за физичката подготвеност и закрепнувањето на играчите.