По освојувањето на титулата во шампионатот, фудбалерите на Риека триумфираа и во Купот на Хрватска откако во финалето со вкупни 2:1 беа подобри од Славен Белупо.

Откако во првиот меч во Копривница немаше победник (1:1), Риека во реваншот на својата „Рујевица“ славеше со минимален резултат (1:0).

Стрелец на единствениот гол на натпреварот беше Наис Џуахра во 60 минута од средбата.

Македонскиот репрезентативец Јован Манев беше на клупата за резервни играчи во Риека, но не доби минутажа.

На спротивната страна целиот меч за Славен Белупо го одигра Илија Несторовски.

Оваа победа на Риека беше и добра вест за Динамо Загреб кој обезбеди директен пласман следната сезона во групите на Лига Европа.