Јаглехидратите се примарен извор на енергија за мозокот и играат клучна улога во когнитивните функции, концентрацијата и помнењето.

Но, не се сите јаглехидрати исти. Додека сложените јаглехидрати од намирници од цело зрно обезбедуваат долготрајна енергија и го поддржуваат здравјето на мозокот, рафинираните и високо обработени јаглехидрати можат да имаат спротивен ефект. Овие нездрави јаглехидрати предизвикуваат нагли скокови и падови на нивоата на шеќер во крвта, што доведува до ментална магла, забавено размислување и проблеми со помнењето.

Со тек на време, прекумерното консумирање на вакви намирници може да придонесе за воспалителни процеси во телото и за инсулинска резистенција – состојби поврзани со пад на когнитивните способности.

Според зборовите на нутриционистката Крутике Нанавати, постојат јаглехидрати кои би требало да се избегнуваат.

Намирници кои му штетат на мозокот

1. Засладени житарки

Засладените житарки се популарен избор за појадок, но често содржат големи количини рафинирани јаглехидрати и додаден шеќер. Целиот тој шеќер може негативно да влијае врз здравјето на мозокот.

„Ова може да предизвика ненадејни скокови и падови на шеќерот во крвта, што доведува до тешкотии со концентрацијата“, вели Крутике Нанавати, пренесува „Јаху“ (Yahoo).

Брзите промени во нивоата на шеќер во крвта му отежнуваат на мозокот да одржува стабилна енергија, што ги нарушува когнитивните функции. Долгорочно, јадењето појадок со многу шеќер може да доведе до отпорност на инсулин (инсулинска резистенција), што дополнително го влошува здравјето на мозокот.

2. Печива и крофни

Печивата и крофните се чест избор за појадок, но содржат многу шеќер и нездрави масти. Според Нанавати, тоа може да ги наруши когнитивните функциии и да предизвикаат проблеми со меморијата.

Комбинацијата на шеќер и транс-масти во овие намирници може да доведе до воспалителни процеси и оксидативен стрес, што негативно влијае на здравјето на мозокот, предизвикувајќи тешкотии со помнењето и фокусот.

Освен тоа, поради нивната висока калориска вредност и ниската нутритивна вредност, овие намирници можат да придонесат за дебелеење и метаболички нарушувања, кои дополнително влијаат на функцијата на мозокот.