На денешната седница на Советот на Општина Тетово советниците изгласаа неколку Предлог одлуки со кои формално-правно од 1 јануари словенечката компанија со која Општина Тетово потпиша договор за менаџирање на сметот ќе може согласно сите законски рамки да започне со работа.

„Се работи за технички точки, со цел на последната седница за оваа година каде ќе се расправа за буџетот да имаме повеќе време. Изгласавме Предлог одлука за вложување на основачки средства од страна на Општина Тетово и словенечката компанија за основање на друштвото „Онеум ДООЕЛ Тетово“ која ќе менаџира со сметот. Усвоивме Предлог одлука за давање на согласност за статутарни промени за ЈКП Тетово, сите ингеренции кои ги имаше за собирање и транспортирање на сметот му се одземаат и се предаваат на словенечката компанија. 51 проценти од Секторот комунална хигиена кој што беше под ЈКП Тетово, сега ќе припадне на словенечката компанија Онеум, останатото ќе биде под Општина Тетово. И таа компанија ќе има обврска да обезбеди нови камиони, контејнери, целото менаџирање со сметот ќе биде на словенечката компанија. Се презентираше и финансиски извештај на ЈП „Градски паркинг“. Ова претпријатие ја заврши годинава со позитивно салдо од 442 илјади денари, за третиот квартал се работи“, рече Бесарт Дурмиши претседател на Советот на Општина Тетово.

Инаку по штрајкот кој вработените на Јавното комунално претпријатие Тетово го одржаа минатиот месец, а на кој побараа да има се исплатат заостанатите плати, општината одлучи да им пушти на сметка само една плата.

Но, се уште како што велат тетовските комуналци не им се исплатени платите за три месеци. Поради ваквите доцнења на платите со години, тие се без здравствено осигурување, а претежно се работи за болни и постари луѓи кои работаат на минусни температури и во многу лоши услови.

Сагата на тетовските комуналци: Останав без интервенција на трансфузиологија, а лековите за аритмија ги купувам приватно оти немам осигурување