Кошаркарски клуб од Дубаи дефинитивно ќе игра во Евролигата, но тој договор нема да биде постигнат за период од пет години, како што се шпекулираше до сега, туку за седум, пренесуваат кошаркарските медиуми ширум Европа.

Наводно, целиот договор е веќе постигнат и во понеделник на 26 февруари треба да се потпише договор кој ќе важи од следната сезона.

Сепак, таа прва сезона клубот од Обединетите Арапски Емирати не би играл во Евролигата, туку во Еврокупот и дури потоа шест сезони би се приклучил во елитното европско клупско натпреварување и за тоа време би донел значителен финансиски капитал.

Од 13-те клубови акционери во Евролигата, според медиумите, само Олимпијакос и Макаби гласале против влезот на клубот од Дубаи во ова натпреварување.

Исто така, првите луѓе на АБА лигата во март ќе гласаат дали овој клуб дефинитивно ќе игра во регионалното натпреварување за кое има сериозни изгледи, а Дубаи своите натпревари би ги играл во Белград.

Претходните денови се споменуваше дека прв тренер на клубот од Обединетите Арапски Емирати би можел да биде Светислав Пешиќ, кој моментно ја извршува функцијата селектор на српската кошаркарска репрезентација, но засега нема потврда на оваа информација.