Друштвото на писателите на Македонија ги објави добитниците на традиционалните годишни награди за 2024 година
На прес-конференција, што се одржа во просториите на Друштвото на писателите на Македонија (ДПМ) на 11 февруари беа објавени петте добитници на традиционалните годишни награди на ДПМ.
Препорачано
Наградата „Стале Попов“ на ДПМ за најдобро прозно остварување во 2024 година ја доби книгата со наслов „Приказничар“ на Жарко Кујунџиски („Антолог“).
Стихозбирката „Посвети и пофалби“ на Иван Џепароски („Дијалог“) ја доби наградата „Ацо Шопов“ на ДПМ за најдобра збирка поезија во 2024 година.
Книгата „Бакнежи на небото“ на Иван Антоновски („Светулка“) е добитник на наградата „Ванчо Николески“ на ДПМ за најдобра книга за деца и млади во 2024 година.
Наградата „Димитар Митрев“ на ДПМ за најдобра книга критика или есеистика во 2024 година ја доби „Книжевни паметници“ на Наташа Аврамовска (Институт за македонска литература).
Наградата „Мост“ на ДПМ за најдобро дело објавено на некој од јазиците на националностите во Македонија во 2024 година ја доби „Била једном једна кућа“ („Си беше еднаш една куќа“) на Гордана Јовиќ-Стојковска („Слово љубве“).
ДПМ упати честитки за добитниците, за финалистите и за сите учесници на конкурсот. Свеченото доделување на наградите ќе се одржи на 13 февруари, во 12 часот, кога ДПМ ќе одбележи 78 години од своето основање.
