Драмата околу продолжението на финалната серија од грчкото кошаркарско првенство заврши попладнево, откако претставниците на Панатинаикос и Олимпијакос, во разговор со министерот за спорт Јанис Вруцис, се согласија дека сè треба да биде подредено на интересите на кошарката. Откако Олимпијакос израмни во серијата на 1:1 во неделата, третиот натпревар беше откажан поради инцидент во кој беше вмешан сопственикот на Панатинаикос, Димитрис Јанакопулос.

Во моментите кога страстите се разгореа и сè изгледаше дека серијата ќе биде тешко да се заврши под нормални околности, реагираше министерството за спорт, закажувајќи средба меѓу Јанакопулос и браќата Ангелопулос. Во еден момент се чинеше дека контроверзниот Грк воопшто нема да одговори на повикот на Вруцис, но по денешната средба, тој го изјави нејзиниот исход со многу охрабрувачки тон.

– Имавме многу добар состанок. Сè помина во најдобар ред. Мислам дека министерот предложи сосема правилно решение за продолжување на првенството. Првенството мора да заврши на паркетот. Ви благодарам на сите многу – рече Јанакопулос пред собраните новинари.

И додека Јанакопулос зборуваше со прилично весел тон за продолжувањето на првенството во Грција, браќата Ангелопулос не беа во такво расположение, што е доста индикативно за понатамошниот развој на настаните.

– Одговоривме на поканата на Владата, а причината за тоа се огледа во почитувањето на извршната власт и министерот за спорт. Инаку, немаше да бидеме тука. Не ни е јасно зошто сме тука – се зборовите на Георг Ангелопулос.

Продолжението на серијата е планирано за петок од 20.00 часот во салата „Мир и пријателство“ во Пиреја.