Со години се одложува донесувањето на закон за високи раководни службеници, со кој нивното именување нема да биде од Владата, туку нивниот избор ќе биде со јавен конкурс, брифираат доброинформирани извори за „Слободен печат“.

-Ниту една влада досега не успеа да изработи едно вакво законско решение, со кое ќе се оневозможи партиското влијание при вработувањата на високите раководни лица, а тие ќе се избираат според образованието, искуството и другите потребни перформанси, како што редот во сите останати конкурси – велат истите извори.

По една недела, откако ВМРО-ДПМНЕ преку аферата „Паразити“, објавува имиња на функционери именувани од владата, како земаат десетици илјади евра на име плата, премиерот Димитар Ковачевски, најави дека Владата подготвува нов закон за плати со којшто треба да се стави ред на енормните месечни примања на директорите. Тој рече дека мора да има закон со којшто ќе се стави ред и конзистентност во примањата особено на раководните лица, поради што предложил да се изработи закон во којшто ќе се дефинира најголемата плата во државата и сите останати ќе се унифицираат врз основа на тоа.

-Институциите од сопствените приходни сметки ги исплаќаат платите, а што ќе содржи новиот закон кој го најавува премиерот се уште не се знае – велат нашите извори.

-Тоа е поголем процес бидејќи се работи за голема управа со голем број на плати. Меѓутоа јас нема да отстапам од тој концепт дека мора да има закон со којшто ќе се стави ред и конзистентност во примањата особено на раководните лица. А што се однесува до другите вработени, тоа е предмет на колективно договарање, каде што мора да учествуваат и синдикатите заедно со работодавците – рече Ковачевски пред неколку дена.

Во контекст на месечните примања на членови на управни и надзорни одбори, премиерот додаде дека кога се зборува за менаџирање со одредена компанија или организација, треба да се споредат перформансите со примањата.

-Опозицијата објави примања на директори на М-НАВ, кои се повеќекратно поголеми од сите примања во државата. Висината на тие примања јас не знам како е определена, бидејќи не сум се занимавал со тоа прашања. Знам дека таму при определувањето на платата има удел и меѓународните организации во кои што таа компанија членува, бидејќи се грижи за контролата на прелетите и летањето над државата. И самите видовте дека при изборот на кадри кои ќе работат таму, тоа го прават консултантски и експертски куќи надвор од државата – изјави Ковачевски.

Инаку во петокот СДСМ реагираше на т.н. афера „Паразити“ повикувајќи го лидерот на ВМРО-ДПМНЕ, Христијан Мицкоски, да каже колку плата земал тој самиот во време на владеењето на ВМРО-ДПМНЕ, кога бил претседател на управниот одбор и генерален директор на акционерското друштво Електрани на Македонија.

-Во тој период Мицкоски беше ангажиран како советник за енергетика на Никола Груевски. Мицкоски да каже колку илјади евра му беше платата во ЕЛЕМ, а колку земаше за да го советува Груевски- возвратија од СДСМ.