Носот е деликатна област со бројни крвни садови и мукозни мембрани, вели д-р Дон Џ. Бисли.

Кубењето влакна од носот со пинцета или депилацијата на ноздрите може да предизвика инфекција, предупреди отоларинголог. Според д-р Никол Аронсон, популарните методи за отстранување на влакна, исто така, може да резултираат со враснати влакна, како и црвенило и иритација.

– Не би препорачала никаков метод за отстранување на влакна од носот. Тие се таму затоа што фаќаат полен, прашина и други иритирачки работи што ги вдишуваме. Влакната делуваат како физичка бариера, спречувајќи ги овие алергени да навлезат во назалните премини и потенцијално да предизвикаат иритација или штета на респираторниот систем. Депилацијата со восок ја пробива бариерата на кожата и создава отвори низ кои бактериите можат да навлезат подлабоко во ткивото. На тој начин се зголемува ризикот од инфекции – изјавила таа за „Хафингтон пост“.

Инфекциите може да вклучуваат назален вестибулитис, кога внатрешноста на носот е погодена од стафилококна инфекција што ја предизвикува бактеријата Staphylococcus. Симптомите вклучуваат црвенило внатре или надвор од ноздрата, грутка слична на мозолче, краста околу ноздрата и болка на таа грутка или чирови во носот.

Ако ви пречат влакната од носот, најбезбедно и најбезболно е да ги скратите со ножици. Изберете ги оние кои се дизајнирани да ги отстрануваат влакната од лицето. Исто така, може да послужат и тримери за нос.