Во чест на 750-годишнината од основањето на Амстердам, посетителите ќе имаат можност да ја видат ретка колекција од 75 уметнички дела на познати холандски мајстори од 17. век, кои се во приватна сопственост. Меѓу нив се и 18 дела на славниот Рембрант.

Изложбата, насловена „Од Рембрант до Вермер – ремек-дела од колекцијата Лејден“, ќе биде отворена во среда во музејот „H’ART“ во центарот на Амстердам. Музејот ја претставува оваа поставка како интимен и уникатен приказ на Холандија од златниот век на уметноста, гледан низ делата на нејзините најголеми уметници.

Покрај познатите имиња, изложбата ќе ги претстави и делата на уметници кои се помалку познати во јавноста, како Франс Халс, Јан Стен, Фердинанд Бол, Герард Дау и Франс ван Миерис.

Еден од највпечатливите експонати е единственото платно на Јоханес Вермер што се наоѓа во приватна сопственост – „Млада жена која седи пред виргинал“. Виргиналот е мал, правоаголен музички инструмент со жици распоредени паралелно на клавијатурата, кој бил особено популарен кај девојките во 17. век.

Сликите на изложбата ги доловуваат различните аспекти на секојдневието во тогашниот Амстердам – од гастрономија и читање, до музика, стареење и родителство, како и традицијата на портретирање и автопортретирање. Прикажани се луѓе од различни општествени класи, било на пазар, во кафеани или во домашна атмосфера.

Посебен акцент е ставен на 17 слики и еден цртеж на Рембрант, кој во 1630 година се преселил од својот роден град Лејден во тогашниот уметнички центар Амстердам.

Колекцијата е сопственост на американско-францускиот милијардер и колекционер Томас Каплан, кој уште од детството бил опседнат со делата на Рембрант. Воден од таа страст, ја оформил збирката Лејден, која сега е достапна за јавноста.

Музејот H’ART нагласува дека изложените слики прикажуваат разновидни женски ликови – од богати матрони и митолошки божици до обични жени. Во поставката е вклучено и дело од Марија Шалкен, една од ретките признати сликарки од тоа време.

Изложбата ќе биде отворена за посетители до 24 август.