На сцената на Националната опера и балет на 24 февруари, со почеток во 20 часот, ќе се изведе ремек-делото „Боеми“ од Џакомо Пучини. Со изведбата на оваа оперска претстава диригентката Бисера Чадловска ќе одбележи 20 години уметничка дејност, соопштија од Национална опера и балет.

Приказната за животот на љубовниците Родолфо и Мими ќе се изведе под диригентската палка на Бисера Чадловска, во режија на Дејан Прошев.

Операта е во четири чина. Дејството се одвива во Париз кон крајот на 19. век, а либретото се базира на „Сцени од животот на боемите“ на Хенри Мургер. Сценографијата за операта е на Зоран Николовски, костимограф е Марија Пупучевска, концерт-мајстор е Верица Ламбевска, а хор-мајстор е Јасмина Ѓорѓеска.

Во „Боеми“ настапуваат Ѓорѓи Цуцковски, Сандра Митровска, Марјан Јованоски, Драган Ампов, Александар Стефаноски, Наде Талевска, Невен Силјановски, Борко Биџовски, Јане Дунимаглоски, Александар Никодиновски, Диме Петров, хорот и оркестарот на Национална опера и балет.

Диригентката Бисера Чадловска веќе 20 години реализира уметничка дејност на сцената на Националната опера и балет. Таа важи како еден од најплодните македонски оперски и балетски диригенти, со завидна бројка од над 50 оперски и балетски наслови во текот на нејзиното 20-годишно работење како прв диригент во Националната опера и балет.

– Музиката е неисцрпен извор на убавина, а една од моите желби секогаш беше да ја диригирам операта „Боеми“. Во изминатите 20 години ја немав таа можност и затоа одлучив за овој мој прв поголем јубилеј да ја диригирам токму оваа опера. Таа е голем диригентски предизвик, прекрасна и емотивна музика. Задоволството е уште поголемо, бидејќи сцената ќе ја делам со моите колеги од оркестарот, хорот и солистичкиот ансамбл на Националната опера и балет, со кои соработувам сите овие години – истакнува диригентката Бисера Чадловска.