Екипата на Зенит Петербург израмни на 2:2 во полуфиналниот плеј-оф од руската ВТБ кошаркарска лига откако со 104:77 го совлада Уникс Казан.

Тимот од Санкт Петербург возврати по двата порази во Казањ и за два дена забележа две победи со вкупна разлика од 39 поени за целосно враќање во серијата.

Зенит на полувремето имаше пет поени предност (51:46), а решавачка беше третата четвртина која избраниците на Чави Пасквал ја добија со убедливи 28:10.

Најефикасен во победничките редови беше Трент Фрејзер со 22 поени, а на спротивната страна доминираше Маркос Најт со 16 поени.

Македонскиот репрезентативец Ненад Димитријевиќ беше втор стрелец со 15 поени (4/7 од поле, 2/5 за три, 1/1 слободни фрлања) за 28 и пол минути игра, воедно запиша по три скока и асистенции, една украдена и три загубени топки.

Следниот меч помеѓу Уникс Казан и Зенит Петерсбург ќе се игра на 26 април.