Бојан Јовановски – Боки првообвинет во аферата „Меѓународен сојуз” е осуден на 9 години затвор, а Фросина Ременски е ослободена од вина, поради немање докази дека била инволвирана во случајот. Таа беше обвинета за помагање во делото измама. Миле Јовановски, таткото на Боки 13 е осуден на условна казна од две години. Јасна Мандиќ-Ерцеговиќ е осудена на 4 години затвор. Асистентката на Боки-13, Христина Блажевска е осудена на казна затвор од една година за помагање. Таа беше ослободена од вина за кривичното дело измама, но беше прогласена за виновна за помагање за „перење пари“. „Меѓународен сојуз“ ќе треба да плати еден милион денари.

Судењето за овој предмет го водеше судијката Софче Гаврилова – Ефремова, а застапник на обвинението беше обвинителката Ивана Трајчева.

Според обвинителниот акт, во периодот од 8 јули 2017 година до 13 април 2018 година Боки-13, како претседател на обвинетата невладина организација Меѓународен сојуз, со намера за себе да прибави противправна имотна корист, ги искористил документите од посочената НВО и довел и одржувал во заблуда две оштетени лица.

Тој лажно прикажувал дека ќе обезбеди државно неизградено земјиште за изградба на Европски центар за возрасни лица и мобилен сервис, како и субвенции од страна на државата и оштетените вака доведени во заблуда на штета на својот имот му исплатиле преку Македонска авторска агенција износи кои надминуваат значителна вредност, и тоа 719.905 евра, односно 233.821 евра во денарска противвредност.

Ова е втора пресуда против Боки-13. Во аферата „Рекет” тој е осуден на 9 години затвор.

Миле Јовановски: Вакви казни може само во Македонија