Дадилка во Канзас, која на барање на преплашените деца за кои се грижела, решила да провери под креветот дали има „чудовишта“, пронашла маж кој се крие таму, соопшти полицијата на Грејт Бенд.

„Дете се пожалило дека има ‘чудовиште’ под неговиот кревет. Кога (дадилката) се обидела да му покаже на детето дека нема ништо под креветот, таа се соочила со осомничениот маж кој се криел таму“, се вели во полициското соопштение.

Се додава дека меѓу осомничениот и дадилката дошло до конфликт, а во тепачката едно дете било соборено, додека мажот избегал од местото, пренесува „Гардијан“.

Откако полицијата пристигнала на имотот, дадилката го идентификувала осомничениот како Мартин Вилалобос Јуниор (27), кој некогаш живеел таму.

Следното утро, полицајците го забележале Вилалобос и по кратка потера го стигнале и го уапсиле.

Вилалобос е обвинет за киднапирање, кражба, напад, загрозување на деца, криминално попречување на службеник за јавен ред и кршење на наредбата за заштита од злоупотреба. Тој е задржан во притвор, а кауцијата е одредена од 500.000 долари.