Фестивалот „Десонанз“ и оваа година продолжува со серија на настани коишто достојно ја третираат македонската современа музика и култура.

Овој викенд во дворот на Кинотеката, публиката ќе има можност премиерно да го слушне новиот материјал на велешкиот мултимедијален артист Audio Portmanning, како и концертната промоција на албумот „The Story of Utopias“ преку настап во живо на Тони Димитров – композитор и продуцент чија долгогодишна работа во полето на амбиенталната музика и употребата на теренски снимки го прави еден од пионерите на експерименталната електронска музика во Македонија.

Фестивалската програма продолжува во соработка со скопското радио Амок. Во текот на трите фестивалски денови, од 15 до 17 јули, со својата уникатна музичка визија ќе се претстават Soul Case, K-R-K и Nastasya Kish – диџеи од новиот бран на македонската електронска сцена кои го дрмаат подиумот низ скопските клубови.

Музичките настани се проследени со видеопроекции од филмскиот опус на младиот режисер Илија Павлов.

(Текстот е објавен во „Културен печат“ број 137, во печатеното издание на весникот „Слободен печат“ на 16-17 јули 2022)