Филмот „Кајмак“ на најтрофејниот македонски режисер Милчо Манчевски ја заврши 2023 година со нова меѓународна награда – седма по ред за филмот, а вкупно десетта заедно со трите кои ги доби Манчевски во текот на изминатата година.

„Кајмак“ беше прогласен за најдобар филм на фестивалот „и-Фест“ во Палермо, Сицилија, кој заврши на 29 декември. Филмот ја доби Меѓународната награда на Град Палермо, а куриозитет е дека таа е изработена од прославениот сицилијански керамичар Нино Парука, кој одбележува пола век творештво.

Фестивалот му оддаде и почит на режисерот Манчевски, со почесна проекција на неговиот легендарен филм „Пред дождот“, добитник на „Златен лав“ во Венеција и на номинација за Оскар, како и со мастерклас, што режисерот го одржа во Палермо.

– Му се радувам на „Кајмак“ оти се покажа дека е едно жилаво филмче – колку повеќе локалната филмска мафија се обидува да нѐ блокира со незаконски средства и него и мене, ние толку повеќе меѓународни награди собираме – изјавува Манчевски.

Новата 2024 година „Кајмак“ ја стартува наскоро во официјална конкуренција за најдобар филм на фестивалот во Буенос Аирес, Аргентина. „Кајмак“ е еден од најуспешните македонски филмови и со најширок пласман во светот.

Станува збор за македонско – данско – холандско – хрватска копродукција поддржана од „Еуримаж“. Светската премиера ја имаше на фестивал во Токио (А-категорија) во ноември 2022, потоа продолжи со глобална фестивалска турнеја во Тајпеј, Португалија, Италија, САД, Холандија, Бугарија, Србија, Црна Гора, Албанија, итн.

Филмот бил поздравен со неколкуминутни стоечки овации и бројни написи во локалните медиуми. „Кајмак“ беше најгледан филм во Македонија во 2022 година.

– Агенцијата за филм сè уште незаконски ги блокира двата проекта на Манчевски, „Кајмак“ и „Збогум, Копакабано!“ (работен наслов „Биста“). Јавна поддршка за Манчевски како укажувач на корупција кој трпи политички прогон изразија Филмскиот фестивал во Венеција, ФИПРЕСЦИ (Меѓународна федерација на филмски критичари), „Транспаренси интернешнл“ и „Whistleblowing International“.

Државната комисија за спречување корупција (ДКСК) на 15 ноември 2023 година побара од Владата да го разреши директорот на Агенцијата за филм Бојан Лазаревски, а од Јавното обвинителство да го гони кривично за незаконско трошење буџетски пари, но двете институции сѐ уште не постапиле по барањето – истакнуваат од „Банана филм“.