Бог, пред да го создаде материјалниот – видлив свет (земјата, небото, ѕвездите, човекот итн.), го создал невидливиот, духовен свет на бестелесни сили. Во почетокот сите духови биле добри, сè додека еден од нив, Деница на лат. Луцифер, не се возгордеал од големата сила што му ја дарувал Господ и целосно се оддалечи од Бога. Тој станал злобен и ги собрал околу себе духовите кои се колебале и им ја наметнал својата волја. Архангел Михаил уште е познат и како војвода на ангелите, затоа што кога Луцифер се отпаднал од Бога, тој застанал на чело на неотпаднатите ангели и прв се впуштил во борба против злото. Ангел е грчки збор и значи – гласник, а демон значи – злосторник.

Затоа на фреските и иконите Архангел Михаил најчесто е претставен како борец – војвода, со меч, а според некои верувања се смета дека тој одлучува кој ќе биде спасен а кој ќе замине во вечноста.

Според учењето на Црквата, има многу ангели, ги сочинуваат небесните војски, а над сите нив е Господ Саваот (Саваот значи господар над војските). Сите небесни војски се поделени на девет чинови, а тие девет чинови имаат три степени.

Во првиот степен се: Шесткрилести Серафими, Многуоки Херувими и Престоли, во вториот се: Господства, Сили и Власти, а во третиот: Началниците, Архангели и Ангели.

Секој човек, кога преку крштевањето ќе стане христијанин, добива свој ангел, кој се нарекува ангел на мирот, чувар на душата и телото. Ангелите го штитат секој човек. Ретко кој не го слушнал гласот на својот ангел чувар во критичните моменти од животот, тоа е гласот на внатрешната духовна борба, која ние ја нарекуваме глас на совеста.

Според учењето на Црквата, постојат осум Архангели: Архангел Михаил (ова име значи кој е како Бог), Гаврил (сила Божја), Рафаил (помош Божја), Урил (Бог – е моја светлина), Салатил (молитва кон Бога), Јеремил (Божја височина). Кон Архангелите се присоединуваат и Јегудил (похвала Божја) и Варахил (благослов Божји).

За да им се оддаде почит на сите ангели, одбран е осмиот ден од месец ноември по стариот календар, а 21 ноември по новиот календар и тој ден се слави под името „Светиот Архангел Михаил и останатите сили небесни и бестелесни“.

Свети Архангел Михаил е една од најчестите слави како кај нашиот, така и кај другите православни народи, познат како Арангеловден. На денешен ден верниците одат во црква и се молат за своето и за здравје на најблиските, а оние кои ја слават оваа слава подготвуваат славски колач.

Во многу делови на Македонија е обичај да им се помага на сиромашните на овој празник. Се верува дека Свети Архангел Михаил им помага на оние кои им помагаат на другите, а дарувањето и помошта се сметаат за голем благослов. Исто така, овој обичај го одразува длабоко вкоренетото христијанско верување во солидарноста и заедништвото, како и грижата несебична грижа за благосостојбата на другите.

На денешен ден исто така именден слават сите оние кои го носат името: Ангел, Ангеле, Ангелина, Михаил, Мила, Милка, Михаила, Михо, Рајко, Рајна, Ратка …