– Како „историски ден и момент за двете земји”, го окарактеризираа денешниот ден шефовите на грчката и италијанската дипломатија Никос Дендиас и Луиџи ди Мајо, откако го потпишаа договорот за разграничување на ексклузивните морски економски зони меѓу Грција и Италија, јави дописничата на МИА од Атина.

Министерот за надворешни работи на Грција рече дека е историски ден, бидејќи претходниот договор бил во 1977 година, а истакна дека цврст стремеж на земјата е „разграничување на морските зони со сите соседи, во рамките на меѓународното право”.

Шефот на италијанската дипломатија изрази убеденост дека со договорот ќе се зајакне историското пријателство меѓу двете земји

На средбата во грчкото МНР станало збор и за туризмот, во пресрет на летната сезона, со оглед на тоа дека Италија не е на листата земји за кои Грција на 15 јуни ги отвора границите.

Министерот за надворешни работи на Италија го информирал неговиот грчки колега за епидемиолшоката ситуација земјата и истакна дека е особено среќен што од Никос Дендиас го уверил дека до крајот на месецот ќе бидат тргнати сите рестрикции за италијанските туристи да можат да патуваат во Грција.